Lagështira, rrezikojnë mbylljen kopshtet dhe çerdhet

Disa kopshte dhe çerdhe në kryeqytet rrezikojnë të jenë të kyçur në shtator, për shkak të lagështirës së madhe që ambientet e tyre kanë. Shqetësimi, që është njëkohësisht edhe një paralajmërim për marrje masash nga strukturat përkatëse jepet nga Drejtoria e Higjienës në Tiranë. Specialistë të këtij institucioni bëjnë të ditur se nga inspektimet e kryera në mbi 70 kopshte dhe çerdhe, në Tiranë, 14% e tyre rezultojnë me shumë probleme. Lagështia dhe amortizimi i ambienteve, ku të vegjlit kalojnë më tepër se 8 orë në ditë, janë më shqetësueset. “Ne nuk jemi mjaftuar vetëm me konstatimin me sy të lagështirës, por ne kemi bërë matjet për lagështirën, temperaturën dhe qarkullimin e rrymave të ajrit. Disa kanë rezultuar me nivel të lartë lagështire, që tregon se impakti i kësaj lagështire në shëndetin e fëmijëve është i madh dhe i dëmshëm”, - pohon Besa Shehu, specialiste e higjienës pranë Drejtorisë së Shëndetit Publik Tiranë (DSHPT). Ndërkaq, Shehu thekson se nëse pushteti vendor dhe Drejtoria Arsimore e Tiranës nuk merr masa deri në shtator, do të propozohet mbyllja e këtyre kopshteve dhe çerdheve. “Do të arrijmë drejt mbylljes së këtyre institucioneve, në qoftë se nuk merren masa gjatë stinës së verës, kur numri i fëmijëve pakësohet dhe kanë mundësi për riparim komplet të institucioneve. Të gjitha kopshtet dhe çerdhet janë inspektuar në Tiranë dhe tani po vazhdojmë me komunat”, - shprehet më tej ajo. Monitorimi i Drejtorisë së Shëndetit Publik Tiranë është kryer gjatë muajit prill dhe maj. Në raport theksohet se këto kopshte dhe çerdhe problematike janë të shpërndarë në të gjithë kryeqytetin.