Lambsdorff u njoftua me pikëpamjet e Lëvizjes Vetëvendosje

Ambasadori Nikolaus Graf Lambsdorff, përfaqësues special i Ministrisë së punëve të jashtme të Gjermanisë për Evropën Juglindore, është takuar të martën në Prishtinë me drejtues të Lëvizjes Vetëvendosje, nga Albin Kurti, kryetar, Shpend Ahmeti, nënkryetar dhe Xhelal Sveçla, sekretar për marrëdhënie me jashtë i kësaj lëvizjeje.

“Në një takim shumë konstruktiv u bisedua për situatën politike dhe ekonomike në Kosovë, vështirësitë me të cilat ballafaqohet Kosova momentalisht, si dhe për zhvillimet në rajon e ndikimet e tyre në jetën e përditshme në Kosovë dhe procesin në përgjithësi”, thuhet në një komunikatë të Vetëvendosjes.

“Ambasadori Lambsdorff u njoftua më përafërm me pikëpamjet e Lëvizjes Vetëvendosje, lidhur me situatën dhe mënyrat se si mund të dalim nga kriza aktuale. Aty u theksua nevoja për të përqendruar energjitë në uljen e papunësisë, rritjen e prodhimit vendor dhe sundimin e ligjit si parakushte për zhvillimin ekonomik”.

Vetëvendosje në këtë takim shfaqi qëndrimin që prosperiteti ekonomik dhe sundimi i ligjit janë të domosdoshme për integrimin e komuniteteve në shoqërinë në Kosovë. Në këtë vazhdë, sipas kësaj lëvizjeje, edhe organizimi, mbajtja dhe monitorimi i drejtë i zgjedhjeve janë themel i demokracisë.