Levizja Nano Rama refuzon te sqaroje bazen socialiste

Kryetari i Partisë Socialiste Edi Rama, në një takim me dyer të mbyllura që ka pasur me të drejtuesit e degëve dhe organizatave bazë në Shkodër dhe Malësinë e Madhe ka refuzuar tu përgjigjej pyetjeve që kishin të bënin me Lëvizjen më të fundit të ndërmarrë nga ish-kryetari Fatos Nano. Raportohet se krerët lokalë të PS-së, kanë kërkuar informacione dhe sugjerime nga kryetari Rama mbi sjelljen e tyre në vijimësi, në raport me organizimin dhe shtrirjen e Lëvizjes Nano në të gjithë vendin. Ata kanë qenë të drejtpërdrejt në pyetjet dhe qëndrimet e tyre, duke nënvizuar nevojën për një orientim nga lidershipi i partisë. Por, mësohet se Edi Rama nuk ka dhënë asnjë përgjigje konkrete, duke anashkaluar temën e diskutimit. E vetmja gjë që kryesocialisti ka thënë në këtë mbledhje ka pasur të bëjë me nevojën për organizimin më të madh, në funksion të zgjedhjeve të ardhshme parlamentare. Rama u ka kërkuar drejtuesve lokalë të zhvillojnë sa më shumë takime me elektoratin e majtë në zonë, duke u shpjeguar programin politik, me të cilin Partia Socialiste do të prezantohet në zgjedhje. Gjithashtu, duke u përqendruar tek puna organizative, Rama ka kërkuar edhe rritjen e numrit të anëtarësisë.
Pas takimeve në rrethet veriperëndimore të vendit, pritet që Edi Rama të zhvillojë gajtë fundjavës takime në Korçë dhe Pogradec. Qëllimi i këtyre takimeve është organizimi i bazës për zgjedhjet e ardhshme. Ndërkohë që shqetësimi kryesor i anëtarësisë socialiste mbetet qëndrimi që ata do të duhet të mbajnë në raport me Lëvizjen Nano, për të cilën deri më tani, Rama ka heshtur.