Lëvizja e lirë, debate në Maqedoni

Opozita shqiptare në Maqedoni akuzoi Qeverinë e Shkupit se nuk ka vullnet politik për të firmosur marrëveshje me Shqipërinë për lëvizjen e qytarëve të dy vendeve pa pasaporta, sic ka bërë me Serbinë dy javë më parë.

Sipas përfaqësuesve të opozitës Qeveria e Gruevskit do përdorë standarde të dyfishta në raport me Tiranën dhe Beogradin, pasi zvarrit arritjen e marrëveshjes për lëvizje pa pasaporta me Shqipërinë edhe përkundër faktit që shteti shqiptar plotëson të gjitha kushtet e nevojshme për një marrëveshje të tillë.

Por këto akuza të opozitës u hodhën poshtë nga zv/ministri i brendshëm, Xhelal Bajrami, i cili tha se Maqedonia është e interesuar që sa më parë të arrijë edhe me Shqipërinë marrëveshje për lëvizjen e qytetarëve vetëm me letërnjoftime. Madje ai paralajmëroi se një marrëveshje e tillë pritet të nënshkruhet vitin e ardhshëm.

Bajrami po ashtu ka njoftuar se së shpejti Shqipëria dhe Maqedonia pritet të arrijnë marrëveshje për formimin e një qëndre të përbashkët kufitare për shkëmbim të informacioneve mes policive të të dyja vendeve.