Lideri që nuk njeh humbjen

Drita po regjistron rezultate të jashtëzakonshme, pas rikthimit në elitën e futbollit kosovar. Gjilanasit janë të vetmit që nuk kanë pësuar asnjë humbje, pas 10 xhirosh të zhvilluara. Trajneri Bekim Isufi thotë se përkushtimi në punë, disiplina dhe përkrahja nga Kryesia, janë armët kryesore të Dritës. Ai pret që gjilanasit ta vazhdojnë ritmin e njëjtë të rezultateve.

Drita ka bërë rikthim sensacional në elitën e futbollit kosovar. Ekipi gjilanas është i vetmi që nuk ka pësuar humbje në Raiffeisen Superligën e Kosovës në futboll, duke regjistruar 6 fitore e 4 barazime, nga 10 ndeshje të zhvilluara deri më sot.

Trajneri Bekim Isufi ka ndërtuar një skuadër mjaft kompakte, e cila u ka shkaktuar kokëçarje kundërshtarëve, me të cilët pati punë deri tash. Ish futbollisti i njohur kosovar treguar se cili është çelësi i sukseseve të ekipit të tij.

“Përkushtimi 100 për qind në punë, disiplina dhe përkrahja e pashoqe që kishim nga kryesia, e cila i ka kryer të gjitha obligimet ndaj lojtarëve, ishin disa nga pikat, që na mundësuan të jemi këtu të jemi”, thotë Isufi për Express.

Ai e pranon se nuk e kishte pritur një nismë të tillë të sezonit, por e dinte se ekipi i tij do t’u shkaktonte probleme ekipeve kundërshtare. “I kemi pasur synimet e qarta që nga fillimi i sezonit. Edhe në fillim pata thënë se Drita do të jetë arrë e fortë për secilin ekip. Ndoshta nuk kam pritur një fillim të tillë të sezonit, por këto rezultate nuk janë të rastësishme. Kemi ekip cilësor dhe qasja është në mënyrën e duhur”, vazhdoi ai.

Drita e mori primatin në Superligë fundjavën që shkoi. Isufi thekson se ekipi gjilanas duhet ta vazhdojë këtë ritëm, pasi që tash e tutje e ka për obligim ta ruajë kryesimin. “Nga fillimi i sezonit kemi pasur gjithnjë kontinuitet të rezultateve dhe tash e kemi për obligim ta mbajmë formën e mirë dhe ta vazhdojmë serinë e rezultateve pozitive”, përfundoi ai.