Liqeni perparon drejt qendres se Shkodres policia mbron pronat

Uji i Liqenit te Shkodres vazhdon te perparoje drejt qendres se qytetit. Brenda 24 oreve bregu i liqenit eshte zhvendosur rreth 300 metra duke e bere situaten edhe me dramatike.

Ne lagjet e permbytura te qytetit me te madh te Veriut mbizoteron gjendja e emergjences humanitare. Me mijera familje jane bllokuar ne katet e larta te pallateve pa energji elektrike dhe ne mungese te mjeteve elementare te jeteses.

Per tu furnizuar ata duhet te levizin me varka te cilat gjenden tani ne te gjitha rruget dhe rrugicat e poshtme te qytetit si ne Venecia.

Ne nje nga rruget kryesore te qytetit qe tashme i ngjason nje lumi eshte krijuar nje port i vogel ku dhjetera varka te vena ne dispozicion nga ushtria bejne transportimin e njerezve dhe mallrave. Nderkohe edhe banoret qe kane varka ne pronesi kane nisur te punojne si taksi. Nje udhetim i shkurter me varkat taksi aq sa per te bere pazar brenda lagjes e per tu kthyer ne shtepi kushton 100 leke.

Shume njerez presin ne kete port te improvizuar per te shkuar drejt banesave te tyre pasi kane marre furnizime ndersa te tjere vazhdojne te levizin permes ujit duke perfituar nga temperaturat ende te larta. Madje ka te rinj qe e shohin si zbavitese situaten dhe kane nxjerre gomonet e vogla te plazhit per te shetitur rrugicave lundruese.

Demtimet me te medha konstatohen ne banesat e lagjeve Tophane dhe Xhabije nderkohe qe uji eshte afruar ne zonen e quajtur Pesekateshi me ure shume prane qendres se qytetit.

Dyqanet dhe magazinat ne hyrje te qytetit jane braktisur dhe jane marre nen ruajtje nga policia. Nderkohe jane me dhjetera automjete qe kane mbetur ne rruge te mbuluara nga uji.

Te banoret e zonave te permbytura duket se shqetesimi me i madh eshte ai per sigurimin e mjeteve per te jetuar. Mengjesin e djeshem prane dyqaneve dhe magazinave qe ndodhen ne zonen e permbytur jane vendosur police per ti ruajtur. Frika nga grabitjet per shkak te rremujes qe mbizoteron ne qytet eshte evidente.

Shkodra po kalon ditet me te keqija te historise se saj. Nje pjese e mire e qytetit eshte paralizuar teresisht nga ujerat. Ende nuk ka ndonje llogaritje te demeve por ne qytet ato jane te medha.
Nga e gjithe kjo panorame duket qarte se Shkodra eshte ne nje situate te jashtezakonshme. Mbreteria e ujit duket se ka gjunjezuar Shkodren.