Lorenzo dominon në Portugali

Kurrë mos thuaj se "ka vdekur" për një kampion si Horge Lorenco. Spanjolli i Yahamas fiton me meritë garën e Portugalisë, të katërtën e sezonit, duke e dubluar suksesin e 2008-s dhe duke mbajtur me vendosmëri të hapur botërorin. 18 pikë avantazh në tri gara nuk janë shumë për Valentino Rosin. Mbi të gjitha, që këtu e deri në fund të sezonit nuk do të jetë edhe aq e qartë se kush nga të dy kryesuesit do të mund të fitojë titullin. Në mes është futur edhe një Kejsi Stoner, i cili duket se e ka kaluar depresionin. Australiani i Dukatit në Estoril është dorëzuar vetëm para ritmit të pakapshëm të Lorencos, por ka larguar me prepotencë dyshimet mbi rikuperimin. I përhershmi Dani Pedroza kompleton podin, duke përfituar nga gara jo e mirë e Valentinos. Rosi në Donington ishte renditur më keq (i pesti), por krahasimi nuk është i përshtatshëm, pasi Vale në Britaninë e Madhe u rrëzua. Ndërsa në Portugali nuk ka qenë asnjëherë kërcënues. Që në start një shkëputje e Lorencos, i cili u vendos para Pedrozës në kthesën e parë. Pas tyre Valentino duket në vështirësi dhe në xhiron e parë parakalohet nga Stoner. Rosi nuk mundej ta mbante hapin e Hondës dhe të Dukatit. Pasi u stabilizuan pozicionet në krye nuk ndryshuan më. Lorenco i jep gaz dhe arrin të krijojë një distancë nga Stoner, duke i mundësuar vetes të garojë pa probleme në xhirot e fundit. Nga ana tjetër australiani nuk është kërcënuar kurrë nga Pedroza. Por ai që nuk mban dot ritmin e të tjerëve është Valentino, i cili xhiro pas xhiroje humbet të qindta të vlefshme. Në disa momente Vale garon një sekondë më ngadalë se Lorenzo. E vështirë të individualizosh problemin, por bëhet fjalë për një skenar vërtet jo të zakonshëm. Vjen tashmë verdikti i parë: Yamaha është kampione e botës për konstruktorë. Një arritje e pashmangshme. Për botërorin e pilotëve do të kemi një duel Rosi-Lorenco deri në fund, me një Kejsi Stoner, i cili mund t‘u heqë pikë të çmuara të dyve. Valentino mbetet favorit, edhe sepse në një garë decizive ka demonstruar se ka diçka më shumë se sa spanjolli.