MJP dënon shpërthimin në Prishtinë

Tiranë (Start)- Ministria e Punëve të Jashtme ka dënuar shpërthimin e mbrëmshëm tek ndërtesa e Zyrës Civile Ndërkombëtare në Prishtinë dhe e konsideron atë një akt që, edhe pse i izoluar, synon të dëmtojë frymën e bashkëpunimit të institucioneve të Republikës së Kosovës me ZCN-në dhe faktorin ndërkombëtar, si dhe vullnetin e dëshmuar tashmë për vendosjen dhe shtrirjen e EULEX-it në tërë territorin e Kosovës.

Ministria e Punëve të Jashtme la vlerësuar reagimin e menjëhershëm të autoriteteve më të larta të Republikës së Kosovës ndaj këtij akti të shëmtuar dhe dënimin e tij nga ana e tyre.

“Duke rikonfirmuar mbështetjen maksimale për autoritetet e Republikës së Kosovës, Ministria e Punëve të Jashtme është e bindur se asgjë nuk do ta pengojë Kosovën për të ecur e sigurtë përpara në ndërtimin e institucioneve, të shtetit të së drejtës dhe zbatimin rigoroz të ligjit, si dhe në konsolidimin e shtetit të pavarur e demokratik, të integruar në familjen europiane dhe euroatlantike”, përfundon reagimi i MJP-së ndaj shpërthimit.