Makarov: Planet amerikane për mbrojtjen nga raketat minojnë sigurimin e Rusisë

Shefi i Shtabit të ushtrisë ruse tha se planet amerikane për mbrojtjen nga raketat drejtohen direkt kundër vendit të tij, pavarësisht garancive të panumurta të Uashingtonit për të kundërtën.
Gjenerali Nikolai Makarov deklaroi për televizionin rus se planet amerikane minojnë sigurimin e Rusisë, dobësojnë arsenalin e saj të raketave dhe pengojnë arritjen e një traktati të ri për kontrollin e armëve.
Ndërkaq zëdhënësi i Shtëpisë së Bardhë, Robert Gibbs tha se ideja sipas së cilës, planet për mbrojtjen nga raketat po pengojnë traktatin e ri, nuk është aspak e vërtetë.
Zyrtarët amerikanë i kanë deklaruar në mënyrë të përsëritur Rusisë se planet synojnë t'i kundërvihen kërcënimit të Iranit dhe në asnjë mënyrë nuk kërcënojnë Rusinë apo dikë tjetër.
Zëdhënësi i Departamentit të Shtetit J.P. Crowlley tha se Shtetet e Bashkuara kanë qenë shumë të hapura dhe transparente lidhur me këtë plan dhe prej vitesh kanë patur bisedime intensive me Rusinë.
Plani amerikan bazohet në një rrjet interceptorësh me bazë në det dhe në tokë në Europë dhe në rajonin e Gjirit Persik.