"Makinat", karta e re e Berishës

Ligji për heqjen e makinave të zyrtarëve ka qenë një nga kartat kryesore politike që Kryeministri Berisha tundi pas zgjedhjeve të 28 qershorit. Për të përmbushur luftën ndaj korrupsionit dhe privilegjeve, kreu i qeverisë theksonte se ky ligj kursente 30 milionë dollarë dhe shkëpuste përfundimisht establishmentin e administratës shqiptare nga praktikat e vjetra të nomenklaturës komuniste. Kreu i qeverisë theksoi se ligji është hartuar sipas modeleve të shumë vendeve të zhvilluara. Në fakt disa shtete të rëndësishme të zhvilluara perëndimore me standard të lartë jetese: si Suedia, Danimarka e Finlanda, u kanë hequr këto privilegje ministrave, madje edhe kryeministrave, ose më mirë vetë këta zyrtarë nuk i përdorin për të qenë të barabartë me qytetarët, por kanë masa të forta sigurie ndaj gjyqtarëve, prokurorëve që janë çdo ditë përballë luftës me kriminelët.