Mallra ndërtimi false,pranga 4 biznesmenëve

 

TIRANE - Grupi i Operacioneve Speciale dhe Antikrimi Ekonomik, pas 11 muajsh hetime, kanë arrestuar 4 tregtarë që prodhonin materiale ndërtimi, duke i tregtuar me logo të falsifikuara firmash që operojnë në Tiranë. Dëmi i konsiderueshëm në mijëra euro që u është shkaktuar subjekteve tregtare, por edhe shtetit, ka vënë në lëvizje Policinë e Tiranës, që ka angazhuar specialistët përkatës për të zbuluar veprimtarinë e kundërligjshme. Operacioni i koduar "Stuko", ka arrestuar tregtarët Avni Bajraktari, 45 vjeç, Arjan Kona, 38 vjeç, Agron Ramlli, 46 vjeç dhe Aurel Çezma, 34 vjeç. Aksioni i Vëzhgimit Operacional, Forcave të Posaçme dhe Antikrimit Ekonomik, u realizua njëkohësisht në katër zona të kryeqytetit, tek "Rruga Ura", Kamëz, rruga e Barrikadave dhe ish-uzina Dinamo. Burime nga policia thanë se baza ku prodhoheshin materialet e ndërtimit, si kollë dhe fino, ishin disa magazina të vjetra të ish-uzinës Dinamo, ndërsa falsifikimi i logove të subjekteve tregtare "Intonaco Fino", "Italcol", "Superkoll", "Alea Mix", etj., bëhej në shtypshkronjën "Miq dhe Paqe". Arrestimi i katër tregtarëve ka ardhur pas dyshimeve se ata kishin konsumuar veprat penale të "Prodhimit të kundërligjshëm të artikujve industrialë dhe ushqimorë", "Mashtrim" dhe "Falsifikimin e vulave, stampave ose formularëve". Pas hetimeve që policia ka nisur që në muajin tetor të vitit 2008, ka rezultuar se produktet e falsifikuara, janë prodhuar dhe tregtuar për një periudhe 2-vjeçare. Burime nga Policia e Tiranës thanë se tregtarët Avni Bajraktari, Arjan Kona, Agron Ramlli dhe Aurel Çezma, u kapën gjatë momenteve të prodhimit dhe të tregtimit të produkteve të falsifikuara. Në vendin e prodhimit të materialeve të ndërtimit policia sekuestroi 5000 thasë me produkte kollë dhe fino me emërtime tregtare "Intonaco Fino", "Italcol", "Superkoll", "Alea Mix" etj. Thasët u gjetën në magazinat e ish-uzinës Dinamo, ndërkohë në shtypshkronjën "Miq dhe Paqe", u sekuestruan lastrat për stampimin e mbishkrimeve tek ambalazhet e produkteve të ndërtimit kollë dhe fino me emërtimet e lartpërmendura. Gjithashtu, u sekuestruan edhe 250 thasë me mbishkrime false gati për t'u mbushur me material, si dhe fletë të printuara në format A1 për t'iu bashkëngjitur produkteve.