Mane Driza, autor i 5 vrasjeve në 3 shtete, marrëveshja mes Londrës e Tiranës e sjell atë në Shqipëri

Mane Driza, 48 vjeç, është përshkruar si një vrasës serial shqiptar që vrau 5 persona në 3 shtete të ndryshme në më pak se 3 vjet.

Ai njihej me nofkën “Tony Montana” ose “Scarface”, sipas personazhit të interpretuar nga Al Pacino në filmin për një bos të krimit.

Mane ishte vetëm 18 vjeç kur kreu dy vrasjet e para në Shqipëri. Motivi ishte gjakmarrja dhe hakmarrja, që lidhej me një konflikt të mëparshëm kriminal me 33-vjeçarin Lavdosh Kanani, i cili kishte kryer një krim ndaj tij.

Mane Driza, së bashku me të atin, ndoqi Lavdosh Kananin dhe e qëlloi për vdekje. Ndërsa largohej nga vendi i ngjarjes, Mane Driza u përball me babanë 71-vjeçar të Lavdoshit, Elmaz Kananin, dhe e qëlloi edhe atë për vdekje, me qëllim që të eliminonte edhe atë.

Kjo vrasje e dyfishtë e detyroi të largohej nga Shqipëria drejt Britanisë së Madhe, duke përdorur emrin e rremë “Sokol Drenova”. Atje nisi të jetonte me një tjetër shqiptar, të quajtur Stefan Mone.

Në qershor të vitit 1999, Stefan Mone i dha të dashurës së tij shtatzënë një unazë ari martese, të cilën e kishte gjetur në apartament, si dhuratë. Pa e ditur, unaza i përkiste Mane Drizës.

Sponsorizuar

Atë natë, Mane kreu një sulm brutal ndaj Stefanit, duke përdorur një bisht kazme, një thikë me teh të kyçshëm dhe një thikë kuzhine. Ai e goditi dhe e theri vazhdimisht, duke i shkaktuar më shumë se 120 plagë.

Menjëherë pas vrasjes, ai u largua drejt Italisë me avion, por do të vriste sërish vetëm gjashtë muaj më vonë.

Mane Driza qëlloi për vdekje dy persona, Artan Maskajn dhe Albert Blushajn, të cilët vdiqën në vend. Ai tentoi të vriste edhe një person të quajtur Lefter Maskaj, por arma iu bllokua, duke i dhënë mundësi atij të largohej nga vendi i ngjarjes.

Policia italiane e lokalizoi shpejt Mane Drizën dhe e arrestoi të nesërmen, duke i dhënë fund serisë së vrasjeve të tij në disa shtete.

Në dhjetor 2001, një gjykatë shqiptare e dënoi në mungesë me 25 vite burg. Më pas, në qershor 2002, një gjykatë italiane e dënoi me 30 vite burg për bashkëpunim për vrasje dhe tentativë vrasjeje. Në vitin 2019, një gjykatë britanike e dënoi gjithashtu me 20 vite burg.

Dënimi i tij në Itali ishte parashikuar të përfundonte në vitin 2026. Por në korrik 2023, Britania e Madhe dhe Shqipëria arritën një marrëveshje që Mane Driza të dëbohej drejt Shqipërisë, ku do të vuante njëkohësisht edhe pjesën e mbetur të dënimeve prej më shumë se 20 vitesh të dhëna nga gjykatat britanike dhe shqiptare.a.b