Maniaku nga Seattle

40-vjeçari, Ian Lee Stawicki, hyri të mërkurën pasdite në një kafeteri të popullarizuar në Seattle (SHBA) dhe vrau katër persona. Pastaj iku drejt parkingut, ku vrau edhe një femër, të cilës ia vodhi automobilin.

Pas gjithë kësaj kërdie, ai u rrethua nga forcat e policisë, të cilat nuk mundën ta arrestonin, sepse Stawicki ndërkohë vrau edhe vetveten.

Baba i pronarit të kafeterisë, që i mbijetoi të shtënave, i tha policisë se sulmuesi kishte probleme psikike dhe se disa ditë më herët në kafeteri kishte shpërthyer një grindje shkaku i tij.

Sipas portalit KOMO News, dy meshkuj që ishin qëlluar në kafeteri vdiqën menjëherë, përderisa dy viktimat e tjera – një mashkull edhe një femër – vdiqën në spital.

Sipas agjencisë Reuters, një dëshmitar i tha KOMO News se kishte parë një grua duke vrapuar rrugës dhe duke paralajmëruar kalimtarët që të mos hynin në kafeteri, për shkak se aty ishte një njeri i armatosur.

Ndryshe, vetëm sivjet në Seattle janë vrarë 20 persona.