Maqedoni, BDI kundër propozimeve të Qeverisë

Bashkimi Demokratik për Integrim ka dalë në kundërshtim me deputetët e Gruevskit në seancën e sotme parlamentare, duke votuar kundër të gjitha propozim-ligjeve të qeverisë, për të cilat nevojitej shumica e badenterit.
Bëhet fjalë për ndryshimet e propozuara në ligjin për kulturë, bujqësi si dhe në ligjin për fondin e filmave.

Deputetët e BDI, PDSH dhe RDK-së kërkuan nga kryetari i Kuvendit, Trajko Veljanovski ta tërheq nga rendi i ditës propozim ligjin e VMRO-DPMNE-s për të ashtuquajturit branitellat. Por kërkesa e tyre nuk u miratua, për faktin se u mbivotua nga deputetët maqedonas. PDSH në shenjë proteste kërkoi pushim njëorësh me qëllim ndërprerjen e seancës.

Deputetja e BDI-së, Ermira Mehmeti - Devaja tha se, partia të cilës i takon ajo nuk do ta votojë ligjin e propozuar nga partia e kryeministrit, Nikolla Greuvski.

“Rikthehem pas gjashtë muajsh dhe gjej situatë të njëjtë. Vijojnë debate politike të cilat i prishin dhe i tensionojnë raportet ndëretnike”, ka deklaruar deputetja Devaja.
Ajo theksoi se, kërkesa për ndryshimin e kushtetutës tani më nuk është vetëm e shqiptarëve por edhe e maqedonasve.

“E dini cfarë ndodhi sot, kjo është hera e parë që maqedonasit po e udhëheqin shtetin drejtë ndryshimeve kushtetuese. Ndryshimi i Kushtetutës tani më nuk është kërkesë e shqiptarëve. Sot u dëshmua se ky është vendim i ligjvënësve maqedonas dhe ne jemi gati për këtë betejtë të gjatë dhe politikisht atraktive”, deklaroi deputetja Ermira Mehmeti - Devaja.

Edhe deputeti i RDK-së, Izet Zeqiri theksoi se ligji është antikushteus dhe se nuk përmend implikim financiare mbi buxhetin, ndërsa sipas disa llogarive të tij është 340 milionë euro.