Maqedoni, PDSH: Qeveria e re nuk ofron asgjë për shqiptarët

Grupi i deputetëve të Partisë Demokratik Shqiptare (PDSH), ka deklaruar se nuk do ta përkrahë përbërjen e propozuar qeveritare.
Agjencia “Ina”, raporton se koordinuesi i PDSH-së Imer Aliu, është shprehur se këto dy ditë nuk vendoset për Qeverinë e re, por vazhdohet mandati i së kaluarës. Sipas tij BDI-ja nuk ndërmori dhe nuk ofroi asgjë për shqiptarët.
 

Ai akuzoi se nuk ka investime në vendet e banuara me shqiptarë dhe se është e vogël përqindja e subvencioneve të bujqve shqiptarë, si dhe është vonuar interpretimi autentik i Ligjit për amnisti.
 

Ndërkaq, Ermira Mehmeti-Devaja nga BDI-ja theksoi se programi që duhet ta votojnë është një program i përbashkët, që i mbulon dhe i reflekton interesat e të gjithë qytetarëve, veçanërisht të dy bashkësive më të mëdha në vend.
 

“Qeveria e re, politikat e saj do t`i bazojë ndaj partneritetit si një formë e bashkëpunimit, si përgjegjësi e qeverisjes dhe si përcaktim për të ardhmen dhe se Qeveria e Maqedonisë e sheh perspektivën e vendit në pjesën e integrimit të brendshëm, të kohezionit etnik dhe integrimit evropian si qëllim i cili duhet të arrihet”, është shprehur ajo.