Mazhoranca: SHISH, agjenci e ekzekutivit, jo pronë apo forum i ndonjë partie politike

Emërimi i Kreut të ri të SHISH, Bregu: “Në përputhje me ligjin dhe Kushtetutën”

Qeveria i është kundërpërgjigjur dje akuzave të opozitës lidhur me emërimin e kreut të ri të Shërbimit Informativ Shtetëror. Zëdhënësja e Qeverisë dhe njëherazi Ministrja e Integrimit, Majlinda Bregu u shpreh se SHISH është një agjenci e ekzekutivit dhe largimi i Bahri Shaqirit dhe emërimin në vend të tij të z.Visho Ajazi, është kryer në përputhje me ligjet dhe Kushtetutën e vendit. “Largimi i Bahri Shaqirit nga posti i Drejtorit të Shërbimit Informativ Shtetëror dhe emërimi në këtë detyrë i zotit Visho Ajazi u bë në përputhje të plotë me ligjet dhe Kushtetutën e vendit. Në çdo vend të lirë të botës, Shërbimi Informativ është agjenci e ekzekutivit dhe jo pronë apo forum i ndonjë partie politike”- u shpreh Bregu. Ajo theksoi se qeveria ka besim të plotë se zoti Visho Ajazi Lika ka të gjithë integritetin, aftësitë dhe përkushtimin për të përmbushur me eficencë dhe dinjitet të plotë, në përputhje me ligjet dhe Kushtetutën e vendit, detyrën e lartë të Drejtorit të SHISH-it, të besuar nga Presidenti i Republikës. “Qeveria ka besim të plote se zoti Visho Ajazi Lika ka të gjithë integritetin, aftësitë dhe përkushtimin për të përmbushur me eficencë dhe dinjitet të plotë, në përputhje me ligjet dhe Kushtetutën e vendit, detyrën e lartë, të besuar nga Presidenti i Republikës”- tha ajo.
Akuzat e PS-së, ministrja e Integrimi i cilësoi si tentativa për të mbuluar papërgjegjshmërinë e lidershipit të opozitës në bllokimin e heqjes së imunitetit dhe marrjes së statusit të vendit kandidat. “Akuzat bëhen për të mbuluar me zhurmë aktin e papërgjegjshëm të bllokimit të heqjes së imunitetit dhe marrjes së statusit të vendit kandidat, kryetari i Partisë Socialiste, Edi Rama dhe shpura e mediave që ai kontrollon, kanë shpërthyer këto ditë në një stuhi histerike, gjoja në mbrojtje të pavarësisë së institucioneve shtetërore, të cilat, sipas tyre, qenkan vendosur në sundim një partiak apo në sundimin e Partisë Demokratike. Qeveria u rikujton shqiptarëve se janë neobllokmenët, ata që erdhën me dhunë në pushtet në vitin ’97, që nxorën me dhunë dhe polici nga zyra, kryetarin e Gjykatës Kushtetuese, Rustem Gjata. Janë neobllokmenët ata që instaluan po me dhunë, në emër të pavarësisë së gjyqësorit, si kryetar të Gjykatës Kushtetuese, anëtarin e byrosë politike të PS-së, Fehmi Avdiun, njeriun që në vitin ’89 kishte dënuar me varje disidentë të pafajshëm”- tha Bregu.
Ndërsa theksoi në këtë drejtim se, “kjo mazhorancë ka votuar për kryetar të Gjykatës Kushtetuese një gjykatës, i cili nuk ka qenë kurrë anëtar i ndonjë partie dhe që nuk ka dhënë kurrë dënime politike”.
Ajo kujtoi gjithashtu se janë pasardhësit e nomeklaturës ata që sunduan institucionet kushtetuese, duke emëruar në to ish ministra të qeverisë socialiste. “Janë neobllokmenët ata që për të rrënuar pavarësinë e institucioneve shtetërore, vendosën në krye të Këshillit të Lartë të Drejtësisë, në krye të Gjykatës së Lartë të vendit dhe Bankës së Shtetit, tre ministra të qeverisë socialiste, përkatësisht zotërinjtë Ilir Panda, Thimio Kondi dhe Shkëlqim Cani. Këta dy të fundit njëherazi edhe anëtarë të Kryesisë së PS”- tha ajo, duke theksuar se, sot, Këshilli i Lartë i Drejtësisë ka si nënkryetar një jurist të respektuar që ka punuar me ndershmëri prej 16 vjetëve në administratën e këtij shteti, asnjëherë anëtar i ndonjë partie.
Po ashtu sipas Bregut, Gjykata e Lartë ka për kryetare një gjykatëse me karrierë të pandërprerë si gjyqtare nga viti ‘87 e gjer sot, e që nuk ka vendosur për vrasjen e ndonjë njeriu të pafajshëm.
Sot, tha ajo, Banka e Shtetit drejtohet nga një bankier me karrierë të pandërprerë bankare prej mbi 20 vjetësh dhe i propozuar në mandatin e tij të parë nga qeveria socialiste.
“Neobllokmenët nuk mund të pranojnë pushtetin e shumicës, ndaj dhe sot ata kërkojnë Kushtetutën e sundimit të pakicës, por kjo nuk do të ndodhë kurrë në këtë vend. Kohërat e etërve të tyre nuk kthehen më. Stuhia histerike e z. Rama dhe shpurës së tij kulmuan pas lirimit nga detyra të Drejtorit të Shërbimit Informativ të Shtetit, Bahri Shaqiri, i emëruar në janar të 2005 në këtë detyrë nga qeveria socialiste. Rama që derdh lot për largimin, në përputhje të plotë me ligjet dhe Kushtetutën e vendit, të zotit Shaqiri dhe emërimin në këtë detyrë të zotit Visho Ajazi, harron se në çdo vend të lirë të botës, Shërbimi Informativ është agjenci e ekzekutivit dhe jo pronë apo forum i ndonjë partie politike”- deklaroi zëdhënësja e qeverisë, Majlinda Bregu.
Gjithashtu, ajo i cilësoi qesharake pretendimet e PS-së kundër zëvendësimit pas tetë vjetësh të Drejtorit të SHISH-it, në një kohë kur qeveritë socialiste, gjatë tetë viteve në pushtet, ndërruan tre drejtorë të këtij Shërbimi. “Zoti Rama dhe suita e tij mediatike bëhen qesharakë kur çirren dhe vajtojnë se u zëvendësua pas tetë vjetësh, Drejtori i Shërbimit Informativ të Shtetit, ndërkohë që qeveritë socialiste, gjatë tetë viteve në pushtet, ndërruan tre drejtorë të këtij Shërbimi dhe nuk nguruan të vendosin në krye të tij, në emër të depolitizimit, anëtarin e kryesisë së PS-së, Fatos Klosin, të ndjekur nga shërbimet e vendit, për lidhje agjenturore me shërbime të huaja dhe të akuzuar botërisht si trafikant armësh, i shkarkuar nga Kryeministri Majko për kontrabandë”. Ndërsa sot, tha ajo, “SHISH drejtohet nga zoti Visho Ajazi, një personalitet i shquar i vendit, jo partiak, me një karrierë akademike dhe zyrtare ndër më të shkëlqyerat”.
Ai u ftua në Shqipëri në kuadër të programit të Ekselencës dhe Brain Gain-it të qeverisë shqiptare, për të kontribuar në zhvillimin e këtij vendi.
Nga viti 2009 e në vazhdim, zoti Ajazi ka dhënë një kontribut madhor në projektet më kryesore të Shqipërisë dixhitale. Ai ka përfaqësuar me dinjitet Shqipërinë në forume të rëndësishme ndërkombëtare të fushës dixhitale si: Këshilltar i Lartë Politik për mbrojtjen kibernetike pranë NATO (senior political advisor for cyber defense to NATO); koordinator kombëtar për programet FP7-ICT; dhe anëtar komiteti për  FP7 -ICT pranë Komisionit Evropian.

Qeveritë e PS ndërruan në 8 vjet 3 drejtorë të SHISH

Fatos Klosi u shkarkua nga kryeministri Majko për kontrabandë armësh

“Zoti Rama dhe suita e tij mediatike bëhen qesharakë kur çirren dhe vajtojnë se u zëvendësua pas tetë vjetësh, Drejtori i Shërbimit Informativ të Shtetit, ndërkohë që qeveritë socialiste, gjatë tetë viteve në pushtet, ndërruan tre drejtorë të këtij Shërbimi dhe nuk nguruan të vendosin në krye të tij, në emër të depolitizimit, anëtarin e kryesisë së PS-së, Fatos Klosin, të ndjekur nga shërbimet e vendit, për lidhje agjenturore me shërbime të huaja dhe të akuzuar botërisht si trafikant armësh, i shkarkuar nga Kryeministri Majko për kontrabandë”.
Kreu i SHISH, Visho Ajazi jo partiak, personalitet me karrierë akademike/“SHISH drejtohet nga zoti Visho Ajazi, një personalitet i shquar i vendit, jo partiak, me një karrierë akademike dhe zyrtare ndër më të shkëlqyerat”. Ai u ftua në Shqipëri në kuadër të programit të Ekselencës dhe Brain Gain-it të qeverisë shqiptare, për të kontribuar në zhvillimin e këtij vendi. Nga viti 2009 e në vazhdim, zoti Ajazi ka dhënë një kontribut madhor në projektet më kryesore të Shqipërisë dixhitale. Ai ka përfaqësuar me dinjitet Shqipërinë në forume të rëndësishme ndërkombëtare të fushës dixhitale”.