Mbrëmja e bamirësisë dhe një garë fustanesh
Ka nisur si një festë bamirësie, por është shndërruar në garën më të ethshme të veshjeve. Mbrëmja Gala e Bamirësisë, organizuar nga Fondacioni i Fëmijëve Shqiptarë, ka mbledhur si çdo vit ajkën e shoqërisë shqiptare.
Të ftuarit përveçse kanë dhënë kontributin e tyre për të ndihmuar fëmijët e sëmurë, kanë pasur rastin të përfaqësojnë denjësisht sërën e tyre, që fillimisht prezantohet nëpërmjet veshjes.
Rregulli i parë i pashkruar, por i zbatuar me përpikmëri nga të ftuarit, pati lidhje pikërisht me këtë gjë: në Ballon Gala të Bamirësisë ndalohen reptësisht veshjet Casual.
Të ftuar chic
Mbrëmjen e së shtunës të datës 20 shtator, qindra të ftuar shkelën tapetin e kuq me veshje elegante; femrat me fustane mbrëmjeje dhe mëshkujt me fustane Chic. E cilësuar si balloja e përvitshme e bamirësisë, ky aktivitet ka si qëllim sensibilizimin e biznesit dhe gjithë shoqërisë shqiptare për të ndihmuar fëmijët e sëmurë. Këtë vit nuk munguan presidenti i Shqipërisë Bamir Topi, i cili shoqërohej nga bashkëshortja dhe dy vajzat e tij, kryeministri Sali Berisha, disa prej ministrave të kabinetit qeveritar, kryetarja e Kuvendit, Jozefina Topalli e shumë të tjerë.
Dress for suçess
E megjithëse qëllimi kryesor është për bamirësi, një qëllim tjetër sado sipërfaqësor është duke lulëzuar, nga viti në vit gjithnjë e më shumë e firmuar: veshja.
Madje pëshpërimat post- ballo, më tepër sesa për eventin në tërësi, kanë të bëjnë pikërisht me veshjet e njërit apo tjetrit nga të ftuarit. Sepse, nëse askush nuk mban mend kontributin material të presidentit apo kryeministrit të vendit, si zor të kenë harruar fustanin e mrekullueshëm Valentino, veshur nga presidentja e fondacionit, apo diamantët, perlat e gurë të tjerë të çmuar e kristalet Sëarovski, që zbukuronin të ftuarat.
E po kështu nëse emrat e vajzave të presiedntit mund të ngatërrohen mes tyre, vështirë të mos kujtosh fustanet e njërës, apo të tjetrës. Vajza e madhe për këtë rast zgjodhi një fustan me dizejnim leopardi Dolce& Gabbana dhe e vogla po një fustanDolce& Gabbana në një ngjyrë rozë të lehtë. Të dyja mbanin në duar kuleta të firmuara Armani dhe Guess. Ndërsa Enada At´ Nikolla vodhi vëmendjen duke i çuditur të ftuarit me ekstravagancën e saj. Por jo dhe aq për shumën ekstravagante të dredhur për bamirësi, sesa për një lajthitje në look. Në mbrëmjen e bamirësisë ajo zgjodhi të veshë fustan mbrëmjeje me vija (stiluar nga vetë Enada), duke shtuar edhe një kapele të vogël republikë në kokë. Një ndërthurje ekstravagante dhe e guximshme e llojit At´ Nikolla, që u veçua mbi të ftuarat e tjera. Por edhe shumë të ftuara jo fort të njohura në botën e modës, këtë mbrëmje ishin të veshura në lartësinë që imponon një ballo gala. Ndaj nuk ishte çudi që shumë prej të panjohurave atë natë u bënë të njohura falë fustaneve e të nesërmen u komentuan si zonjusha me fustainin e kuq flakë, apo zonja me kostumin e gjelbër.