"Mbrojtja e dëshmitarëve" mbërrin në komisione

Me propozim të Ministrisë së Brendshme, qeveria ka paraqitur në Kuvend ndryshimet në projektligjin "Për mbrojtjen e dëshmitarëve dhe të bashkëpunëtorëve të drejtësisë". Sipas qeverisë, kjo bëhet për të mbrojtur dëshmitarët, duke pasur parasysh se dëshmia është prova më e rëndësishme në zbardhjen e çështjeve të ndryshme dhe një element thelbësor për funksionimin e sistemit të drejtësisë. Në projektligj parashikohet që të shmanget pjesëmarrja e gjyqtarëve në procesin e mbrojtjes së dëshmitarëve, pasi ata nuk kanë arsye të mësojnë hollësi për organizimin e programit të mbrojtjes së dëshmitarëve dhe se shpesh ata kanë seanca gjyqësore që kufizojnë mundësitë për të marrë pjesë në mbledhjen e komisionit, duke veçuar vetëm rastet urgjente. Objekti i bashkëpunimit parashikon zbatimin e ndërsjellë të programit të mbrojtjes përfshirë ndryshimin e vendbanimit dhe qëndrimin e personave të mbrojtur në territoret përkatëse të palëve. Projektligji është i përbërë nga 30 nene të ndara në 5 kapituj. Ky projektligj tashmë pritet të diskutohet në komisionet përkatëse për t‘i kaluar më pas për miratim Kuvendit dhe pas votimit hyn në fuqi për zbatim.
E.Gj.