Merr para hua për të paguar energjinë e fshatit

Një punonjësi të Komunës së Proptishtit, në rrethinat e qytetit të Përrenjasit, i kanë kushtëzuar vendin e punës, nëse fshati ku banon nuk paguan energjinë elektrike. Për pasojë, 50-vjeçari, Ramazan Llapushi, arkëtar pranë kësaj komune, është detyruar të marrë para hua, në mënyrë që të paguajë detyrimet që kishin bashkëfshatarët e tij në filialin e KESH-it, ndërkohë që ai vetë ka fituar sigurinë e mbajtjes së vendit të punës. Ramazan Llapushi prej 31 vjetësh punon si arkëtar që nga koha e ish-kooperativës në arkën e komunës. Familja e tij, e përbërë nga shtatë anëtarë, ka burim të ardhurash vetëm pagën e tij prej 14350 lekësh, të ardhura këto që i sigurojnë minimumin jetik të familjes së tij. Pak kohë më parë, 50-vjeçarit i kanë vënë kushtin se, nëse fshati ku ai banon nuk do të likuidonte faturat e energjisë elektrike, ai do të hiqej nga puna. I vënë para këtij fakti, Ramazani ka marrë borxh 1.1 milionë lekë tek të afërmit dhe miqtë e tij, ndërkohë që ka shitur të gjitha bagëtitë dhe orenditë shtëpiake, për të plotësuar shumën që duhej arkëtuar në KESH për faturat e energjisë elektrike të banorëve të zonës së Mokrës. Komuna Proptisht përbëhet nga 17 fshatra dhe varfëria ka detyruar banorët e zonës të mos paguajnë detyrimet ndaj KESH. Arkëtari nuk është i sigurt nëse do të mund t‘i marrë mbrapsht këto lekë, por ndihet i kënaqur, që të paktën këtë muaj, arriti të ruajë vendin e punës.