U kërkua si "i arratisur", rikthehet i burgosuri

I ishte dhënë leje nga burgu, por ai nuk është kthyer në kohë, duke vënë kështu në lëvizje gjithë policinë për kapjen e tij. Bëhet fjalë për një të dënuar me 5 vjet burg për mbajtje pa leje të armëve luftarake, i cili është kthyer ditën e djeshme, duke justifikuar edhe vonesën. Fillimisht është deklaruar se Beldar Lika është arratisur duke shfrytëzuar lejen e dhënë nga burgu. Por më vonë, Drejtoria e Përgjithshme e Burgjeve ka shpjeguar se ai është kthyer në qeli. Sipas informacioneve zyrtare, i dënuari Bledar Haxhi Lika, 33 vjeç, lindur dhe banues në Berat, është dënuar me 5 vjet burgim nga Gjykata e Rrethit Gjyqësor Berat, për veprën penale "Mbajtje pa leje të armëve dhe municioneve luftarake". Nga dënimi i kanë mbetur edhe 1 vit e 7 muaj burg. Më datë 05 maj 2009, nga Drejtoria e Institucionit të Ekzekutimit të Vendimit Penal Rrogozhinë, bazuar në ligjin 8328 "Për të drejtat dhe trajtimin e të dënuarve dhe paraburgosurve", Likës i është dhënë leje. Kjo është ofruar pas kërkesës së tij për arsye të sëmundjes së babait të tij. Pas verifikimeve të bëra për vërtetësinë e sëmundjes dhe vlerësimit pozitiv të marrë nga punonjësit socialë dhe juridikë, u vendos dhënia e lejes për të dënuarin Bledar Lika. Leja shpërblyese iu dha nga data 05 maj deri në orën 17:00 të datës 10 maj. Pas mbarimit të afatit të lejes së dhënë dhe mosparaqitjen e të dënuarit në institucion, u njoftuan Autoritetet Përkatëse Policore, Pikat Kufitare, si dhe Prokuroria e Rrethit. Por, më vonë ai është kthyer. Bazuar në deklaratën personale dhe informacionet e marra nga institucioni, i dënuari Lika kishte tejkaluar orarin e kthimit në institucion, pasi kishte shkuar për vizitë te një i afërm në Durrës. Prokuroria e Rrethit Gjyqësor Kavajë ka nisur procedimin penal ndaj të dënuarit, për thyerje të rregullores së vendit të vuajtjes së dënimit dhe nenin 323 të Kodit Penal.