Mihani: Besa smund të gabojë në asnjë ndeshje

Nga Leonard Dushku

Mesfushori kavajas, Meglid Mihani, pret vetëm fitore nga skuadra e tij në transfertën e kësaj jave me Skraparin 
Besa nuk ka qenë ajo që të gjithë prisnin gjatë këtij kampionati, pasi ka pasur shumë ulje-ngritje dhe aktualisht mban vendin e 4-t. Presidenti Bizhdili bëri disa lëvizje gjatë merkatos së dimrit, duke parë se skuadra nuk funksiononte si duhet, por gjërat nuk kanë ndryshuar shumë në nivelin e lojës, edhe pse Besa ka fituar 5 nga 6 ndeshjet e fazës së dytë.

Kavajasit janë mundur vetëm në Kukës, por kanë fituar disa transferta të vështira, siç janë Erseka dhe Vlora. Përpara është ndeshja me Skraparin në fushën e këtij të fundit dhe kavajasit mendojnë vetëm 3 pikët.

Mihani Mesfushori Meglid Mihani thekson mes të tjerash për Sportin shqiptar se çdo ndeshje që ka mbetur është shumë e rëndësishme dhe nuk duhet veçuar asnjë kundërshtar, pavarësisht nga emri dhe pozicioni në tabelë. Fitoret e njëpasnjëshme na kanë dhënë më shumë kurajë për këtë fazë finale të kampionatit. Jemi në momentin, kur nuk duhet humbur asnjë pikë, kështu që edhe Skraparin e vlerësojmë njësoj si rivalët tanë.

Është një ndeshje mjaft e rëndësishme dhe e rëndësishme, pasi të tilla janë të gjitha transfertat. Kam shumë besim, sepse skuadra gëzon moral të lartë. Po ashtu, edhe me përvojën që kemi, them se do të kthehemi me 3 pikë nga Skrapari. Trajneri Magani ka kërkuar që gjithë të luajmë me zemër dhe grintë në fushë.

Na takon ne futbollistëve të bëjmë tonën në fushë dhe të mos i ndërlikojmë gjërat pikërisht në këtë moment. Besa duhet të kalojë direkt në superiore dhe për këtë duhet të bëjmë përpjekjet maksimale, është shprehur futbollisti kavajas, Mihani.