Mikel: Më ndihmoni ta gjej babanë

John Obi Mikel është i tronditur dhe i shkatërruar, pasi kuptoi se babai i tij është kidnapuar në Nigeri. Mesfushori i Chelseas kërkon nga autoritetet e vendit që ta ndihmojnë që ta gjejë babanë e tij

Michael Obi, i cili udhëheq një kompani transportuese ndërshtetërore në Jos, është zhdukur të premten. Përpjekjet e ndryshme për të kontaktuar me të nuk kanë sjellë rezultate pasi celulari i tij nuk ka qasje nga e shtuna.

“Unë jam nigerian dhe gjithmonë e kam ndihmuar vendin tim në çdo mënyrë të mundshme. Tash ata duhet të më ndihmojnë mua, të më ndihmojnë ta gjej babanë. Familja ime është e shkatërruar, po ashtu edhe unë. Dëshiroj të kthehem në Nigeri, por tash nuk mundem. Nëna ime është e frikësuar. Kërkoj nga ata që dinë diçka të na ndihmojnë që të dalim nga kjo situatë”, deklaroi për Sky Sports mesfushori i Chelseas, i cili luajti të dielën, edhe pse u njoftua me rastin.

Mikel nuk është futbollisti i parë nga Premierliga të cilit i është rrëmbyer një familjar në Nigeri. Në korrik 2008, vëllai më i madh i mbrojtësit të Evertonit, Joseph Yobo ishte kidnapuar në Port Harcourt. Nornu Yobo ishte liruar 10 ditë më vonë, por nuk dihej nëse ishte dhënë ndonjë shpërblim.