Milan, statistika për Serie B

Milani i rekordeve, por vetëm negative. Rossonerët, për herë të parë pas 80 vitesh kanë pësuar katër humbje në shtatë xhirot e para në Serie A. Skuadra ka tubuar vetëm shtatë pikë duke shënuar shtatë herë dhe duke pësuar po aq gola. Nga konkurrenti për Scudetto, Milani aktualisht ka pikë të barabarta me Pescarën.

Është stinori i rekordeve për Milanin. Por, deri më tani, vetëm negative. Duke filluar nga 22.106 abonimet vjetore nga tifozët, shifra më e ulët prej kur Silvio Berlusconi gjendet në drejtim të gjigantit nga San Siro.

Kurse, edhe rezultatet e ekipit janë dëshpëruese, si kurrë më parë. Shtatë pikë nga shtatë ndeshjet e para në Serie A. E që për kuriozitet përcillen me shtatë gola të shënuar dhe shtatë të pranuar.

Këto janë statistikat e Rossonerëve deri më tani, gjatë këtij sezoni, e që më tepër i ngjajnë një skuadre që lufton për mbijetesë. Milani të dielën mbrëma humbi derbin e qytetit nga Interi me rezultat minimal 1-0, disfata e katërt në shtatë xhirot e para, e që nuk u ka ngjarë Rossonerëve në 80 vitet e fundit.

Jemi vetëm në tetor, por qysh tani lufta për titull duket pothuajse e paarritshme për Milanin, që ka tetë pikë më pak se Lazio që zë pozitën e tretë, të fundit për kualifikim në Ligën e Kampionëve, dhe plot dymbëdhjetë më pak se liderët Napoli dhe Juventusi.

Para se të shikojë lart, Milani duhet të analizojë atë që ka në shtëpinë e tij.

Skuadra nuk është as përafërm asaj që ishte në edicionin e kaluar, e sidomos pas largimit të qendërmbrojtësit Thiago Silva dhe sulmuesit Zlatan Ibrahimovic, për të mos përmendur të tjerët si Clarence Seedorf, Gennaro Gattuso, Mark van Bommel e Gianluca Zambrotta.

Trajneri Massimiliano Allegri është në konfuzion, kurse klubi është në gjendje të krizës financiare dhe vështirë se mund të lejojë shkarkimin e trajnerit dhe angazhimin e një tjetri.

Nënkryetari, Adriano Galliani në fund të afatit kalimtar të verës kishte deklaruar kështu: “Me ardhjen e Krkicit dhe De Jongut, Allegri nuk ka për çka të brengoset, sepse objektivi nuk është më pozita e tretë. Tani duhet të luftojmë për të fituar, njësoj sikurse në dy vitet e fundit. Me këto përforcime, Milani na e ka ngushtuar disavantazhin”.

Fjalë, fjalë dhe vetëm fjalë. Njësoj si këto të Allegrit: “Nëse më largojnë, do të mbetem trajneri i cili ka fituar më së shumti pikë në dy sezonet e fundit në Itali”.

Por, edhe ai që ka fituar vetëm shtatë nga shtatë ndeshjet e para. Bilanci më i keq i epokës Berlusconi. Për më tepër, skuadra ka pikë të barabarta me Pescarën, skuadër e promovuar këtë edicion në Serie A.