Miliband: Vizioni i vendeve të Ballkanit Perëndimor për të hyrë në BE, i drejtë

Sekretari i Jashtëm britanik, David Miliband vlerëson se vendimi i Gjykatës Ndërkombëtare të Drejtësisë, do të konsolidojë faktet ekzistuese në rajon. Sipas tij, për momentin çështje kyçe mbeten korrupsioni dhe qeverisja. Ky do të jetë moment kyç. Mendimi ynë legal është absolutisht i qartë. Nuk ka arsye që njerëzit të presin vendimin. Është shumë me rëndësi se faktet,

që ekzistojnë tani në Ballkanin Perëndimor do të konsolidohen pas vendimit të Gjykatës Ndërkombëtare të Drejtësisë, nënvizoi ai. Sekretari i Jashtëm britanik thotë se Kosova është ulur në shkallën e matjes së rrezikut, kurse Bosnja e Hercegovina është ngritur. Miliband shton se në vitin 2008 ai dhe ish ministri i Jashtëm çek paraqitën brengosjet e veta lidhur me Bosnjën në një letër drejtuar ministrave të jashtëm të Bashkimit Evropian. I pyetur lidhur me të ardhmen e Kosovës dhe Ballkanit, sekretari jashtëm britanik, David Miliband thekson rëndësinë e Bashkimit Evropian për rajonin. Sipas tij, nëse Bashkimi Evropian dëshiron të jetë efektiv, ai duhet të jetë në gjendje të kujdeset për fqinjët e vet. Bashkimi Evropian duhet të jetë. Nëse politika e jashtme evropiane do të jetë efektive, ajo duhet filluar me fqinjët e vet. Vizioni i të gjitha vendeve të Ballkanit Perëndimor për të hyrë në Bashkimin Evropian është vizion i drejtë, shumë i rëndësishëm dhe një ndër çështjet e rralla, që i bashkon shumicën e njerëzve në Ballkanin Perëndimor, thotë sekretari i Jashtëm britanik, David Miliband. Ndër të tjera nëpërmjet kësaj interviste, ai ka theksuar se dy vjet pas shpalljes së pavarësisë, kur është fjala për njohjen deri tani nga rreth 64-65 vende mund të thuhet se ky është një zhvillim qendror. Në këtë drejtim Miliband, shton se derisa një zhvillim i këtillë nuk është i shkëlqyeshëm, ai është zhvillim qendror. Në lidhje me qeverisjen dhe korrupsionin, sekretari i jashtëm britanik thotë se në këtë drejtim këto çështje kyçe mbeten për tu trajtuar. Sa i përket ekonomisë, Miliband thekson situatën globale ekonomike. Viti 2008 ndoshta nuk ishte viti më i mirë për të shpallur pavarësinë duke pasur parasysh ngjarjet në ekonominë globale, thotë ai. Përsa i përket marrëdhënieve me Serbinë, sekretari i Jashtëm britanik, Miliband thekson rolin e qeverisë serbe. Ai thotë se qeveria e Tadiçit ka ecur në një rrugë mjaft të kujdesshme, gjë që është e mirëseardhur.