Miliband takon Lavrov, përmirësohen raportet Rusi-Britani

Ministri i Jashtëm britanik, David Miliband po zhvillon një vizitë dy ditore në Rusi. Të dielën ai u takua për bisedime jo zyrtare me homologun e tij rus Sergei Lavrov. Bisedimet Miliband-Lavrov po vijojnë edhe gjatë ditës së sotme, ku përveç të tjerash, Miliband do të takohet edhe me përfaqësues të biznesit rus. Miliband është i pari ministër i Jashtëm britanik që viziton Rusinë në pesë vitet e fundit.
Raportet mes dy vendeve u acaruan veçanërisht pas helmimit në Londër të ish agjentit të shërbimit sekret rus Aleksandër Litvinjenko. Rusia nuk pranoi kërkesën britanike për të dorëzuar të kërkuarin rreth këtij rasti, Andrei Lugovoin.