Minatorët rifillojnë grevën, përleshen me policinë

 

Protesta e paralajmëruar e sindikatës së minatorëve ka degraduar në përleshje me forcat e policisë. Të grumbulluar përpara kryesisë së Kuvendit, ata kanë kërkuar plotësimin e kërkesave të tyre të cilat i parashtrojnë që prej disa muajsh. Në duar mbanin  parulla si “Sindikalizëm, jo hipokrizi” apo “10 vjet nën tokë, 50 vjet në pension”. Përveç motit me shi, minatorëve nga i gjithë vendi u është dashur të përballen dhe me dhunën e forcave të rendit. Përplasja ndodhi pasi policia kërkoi të shoqëronte në polici kreun e shoqatës së minatorëve, Fiqiri Xibrin. Veprimi është kundërshtuar nga minatorët, të cilët nuk kanë lejuar që policia të marrë në makinë kryetarin e tyre. Ndonëse protesta e tyre zhvillohej me leje, efektivët blu nuk janë penguar aspak që të bëjnë të gjitha përpjekjet për të mos lejuar vijimin e saj. Që  prej 5 ditësh minatorët kanë hyrë serish në grevë urie pasi kërkesat e tyre nuk janë realizuar ende që prej ndërprerjes së grevës së urisë që zhvilluan pak kohë më parë. Asokohe për të arritur konsensus ndërmjet tyre dhe qeverise u angazhua edhe presidenti i vendit. Në protestën e djeshme morën pjesë edhe  minatorë nga miniera e Bulqizës, ku pas disa ditësh pritet të zhvillohet një protestë e madhe ndaj neglizhencës së qeverisë në lidhje me realizimin e kërkesave të tyre. Kërkesë kryesore e tyre është rritja e pagës së pensionit dhe ulja e moshës për ta përfituar atë, pasi në shumë raste minatorët nuk arrijnë ta gëzojnë atë. Në vijim një përfaqësi prej 3 minatorësh i është drejtuar Kryeministrisë për të kërkuar një takim me kryeministrin Berisha, ose një përfaqësues të qeverisë. Ata paralajmërojnë  përshkallëzim të protestës, deri në bllokim të rrugëve në të gjithë Shqipërinë.