Miniera e Bulqizës, PS: Kamp përqendrimi, ku varfëria mban peng jetën

Tiranë- “Galeritë e minierave janë shndërruar në kampet e përqëndirmit të kohëve moderne, ku varfëria mban peng vetë jetën dhe lirinë e minatorëve e familjarëve të tyre, ndërkohë që pushtetarët e biznesmenët të babzitur nxjerrin miliona euro përfitime me çmimin e lirë të lëkurës së minatorëve skllevër, që varfëria i detyron të punojnë e vdesin në galeritë e minierave”.

Kështu shprehen në letrën drejtuar ministri të METE, Nasip Naço nga një grup deputetësh të Partisë Socialiste në shprehje të shqetësimit për tragjeditë e njëpasnjëshme që po shakkton miniera e kromit në Bulqizë.

“Edhe pse greva e minatorëve mori fund pak kohë më parë me një marrëveshje ndërmjet Sindikatës dhe Shoqërisë Koncesionare ACR duke i dhënë vetëm zgjidhje të përkohshme problemeve të vetë minatorëve, familjeve të tyre, qytetit dhe banorëve që jetojnë me galeritë e minierës, fakte të njëpasnjëshme më kokëforë sesa justifikimet politike Tuajat, të Kryeminsitrit e të Qeverisë, na lënë të kuptojmë se zgjidhja përfundimtare është më larg se kurrë, siç është rreziku fatal më afër se ndonjëherë më parë”- thuhet në letër.

Sipas deputetëve socialistë gjatë këtij muaji kanë humbur jetën mbi 5 minatorë. Duke shtuar se fëmijë e familje vazhdojnë mbeten jetim mes katër rrugëve pse kanë humbur prindin, vëllain a të afërmin në errësirën e tuneleve.

Sipas tyre një problem shumë shqetësues është shfrytëzimi i këtyre pasurive kombëtare pa asnjë kriter.

“Pasuria kombëtare në minierën e Bulqizës ashtu si dhe në çdo burim tjetër minerar, vazhdon të shfrytëzohet pa asnjë kriter duke rrezikuar seriozisht shkatërrimin përfundimtar dhe varrosjen pa kthim të pasurisë kombëtare”- thuhet në letrën drejtuar ministrit Naço, duke shtuar se ekzistojnë dyshime serioze sipas të cilave grupe tërësisht mafioze e të veshura me pushtet, kontrollojnë shfrytëzimin dhe tregëtimin e mineralit duke përdorur minatorët si skllevër e pasurinë kombëtare si mall pa zot.

Grupi i deputetëve të PS-së në Kuvendin e Shqipërisë kërkojmë informacion të detajuar e të plotë për çështjet e poshtëshënuara:

1.      Sa janë minatorët që kanë humbur jetën në galeritë e minierave nga viti 2000 deri sot?

2.      Cila është pozita ligjore e kompanisë ACR në raport me shtetin shqiptar?

3.      Cili është kontraktori i vërtetë? Vazhdon Darfo me nënkontraktor ACR apo është ACR që zëvendëson Darfo me ndryshim emri?

4.      Darfo SRL dhe Darfo SPA janë e njëjta kompani apo dy të ndryshme?

5.      Cili është aktiviteti ekonomik i ACR nga viti 2000 kur është regjistruar për herë të parë si person juridik deri në 2007 kur filloi biznesin e mineralit në Bulqizë?

6.      Sa eshte prodhimi i mineralit te kromit në Minierën e Bulqizës?

7.      Nga prodhimi i pergjitheshem i mineralit te kromit sa eshte shkrire ne uzinat e ferrokromit dhe sa eshte ekportuar direkt si mineral?

8.      Sa eshte vellimi i eksportit te mineralit te kromit apo ferrokromit ne ton dhe ne vlere?

9.      Bazuar në Marreshjen koncesionare të miratuar në Parlament 10 vite më parë, sa është totali i investimeve të realizuara nga Koncesionari për secilin nga zërat e marrëveshjes?

10.  A ka filluar te hapet Zona Veriore e minieres se Kromit Bulqize? Sa eshte avancuar drejt thellesise dhe kur perfundon hapja e saj?

11.  METE, dhe ju si Ministër i METE, i njihni vlerë ligjore dhe detyruese marrëveshjes së nënshkruar në 9 Korrik 2009 ndërmjet Ministrit Ruli dhe ACR, marrëveshje që modifikonte marrdhënien koncesionare, por që ende sot e kësaj dite nuk është miratuar në parlament siç e kërkon ligji?

12.  Cili është arsyetimi institucional bazuar në Kushtetutën e RSH dhe legjislacionin në fuqi sipas të cilit kjo marrëveshje edhe pse e pamiratuar në Parlament, ka fuqi ligjore?

13.  Sa është fitimi i deklaruar i Koncesionarit kryesor në Bulqizë?

14.  Sa serioz është rreziku që Bulqiza të shkatërrohet për shkak të mungesës totale të investimeve kapitale?

15.  Sa është numri total i subjekteve të liçensuara që shfrytëzojnë pasuritë minerare të Bulqizës?

16.  Në dijeninë tuaj, sa është numri i subjekteve që punojnë pa asnjë liçensë?

17.  Sipas raporteve që ju dispononi, afërsisht sa ton mineral përbën tegu i mineraleve që eksportohet?

18.  Cilat janë kushtet e punës së minatorëve?

19.  Sot që flasim a po punohet në ndonjë zonë që haptazi cilëzohet si tejet e rrezikshme për jetën e minatorëve?

20.  Sa është numri i çështjeve gjyqësore të përfunduara ndërmjet kompanive private dhe METE sa i përket shfrytëzimit të pasurive minerare dhe cili është përfundimi i tyre?

21.  Për çështjet gjyqësore të përfunduara në favor të kompanive private, sa është shuma totale e dëmshpërblimit të caktuar nga gjykata që duhet të paguajë shteti?

22.  Sa është numri i çështjeve gjyqësore në vazhdim ndërmjet kompanive private dhe METE sa i përket shfrytëzimit të pasurive minerare dhe cila është ecuria e tyre?

23.  Miniera e Kromit Bulqize a eshte shpallur si miniere me regjim gazi? A garantohet jeta e punonjesve ne kete miniere duke punuar me paisje qe nuk plotesojne kushtet e antideflagrances?

Dy ditë më parë miniera e Bulqizës i mori jetën një tjetër minatori, duke shkaktuar kështu edhe tragjedinë e rradhës brenda galerive të kësaj miniere. Edhe pse ka pak ditë që puna në minierë ka rifilluar pas 6 muajsh ndërpreje, pas zhbllokimit të punës nga Ministria e Ekonomisë, Tregtisë dhe Energjitikës, siç duket jeta e minatorëve vazhdon të jetë në rrezik gjatë procesit të punës në minierën e kromit.

Dorina Bilbili/IDEA

No related posts.