Mirë që kemi burra shteti

As kjo vap’e nxehtë e gushtit

Vrullin s’na e ka ndaluar

Natën po e bëjmë ditë

po pushojmë duke punuar

Udhëheqësi n’Durrës zgjohet

Në drekë çan me not Dhërminë

Pret shiritin në Bërzhitë

Dhe në darkë të del në… Kinë!

Duke parë ca mundje xhudo

me xha Bushin bisedon

situatën në Shqipni

një me një po ia shpjegon…

Bushi ndeshjet duke parë

i jep garanci të plotë:

“Valoja siç ia valon...

bjeri pushtetit me top.

Ti e di që unë po iki

Edhe gruaja po më lë

Po ti rrush, bëj si të bësh

unë nuk të ndihmoj dot më...”.

Edhe Lula i Brazilit

kur e pa shokun Sali

menjëherë e nxori ftesën

dhe ia zgjati me shpejtësi:

“Po të ftoj për Karnavalet

të më vish shok në Brazil

Pa ty kot i kemi bërë,

qenke komplet karafil!...

Takoi të parin e Kinës

me të madhe deklaroi:

“Partia jote dhe unë

historinë do ta ndryshojë...

…Neve, shok, po bëjmë epokë

mirë bota le ta di

Unë jam luan në Europë

juve jeni në Azi...”.

Kinezit iu bë qejfi shumë

edhe prerë i deklaroi:

“Sapo Lojërat të mbarojnë

Kina do ju investojë...

…vetëm listën na e jepni

kreditë ashtu si i doni

të gjata, të mesme, të shkurtra

hapni gojën edhe thoni...”.

Mirë që kemi burra shteti

që zanatin mirë e dinë

dhe kur janë me pushime

mendojnë veç për Shqipërinë…!