Mjekesi vijon protesta e specializanteve

Rektori i Universitetit të Tiranës, Dhori Kule dhe drejtori i Politikave Shëndetësore në Ministrinë e Shëndetësië, Pallumb Pipero kanë sqaruar studentët specializantë në lidhje me skualifikimin e tyre nga faza e tretë e konkurimit, intervista, për të cilën protestuan një ditë më parë.

“Rregullorja e ka të qartë se kalojnë vetëm fituesit. Këta fitues intervistohen dhe roli i intervistës është që të bëjë seleksionimin përfundimtar në logjikën e klasifikimit”, ka sqaruar Kule.

Ndërsa sipas zotit Pipero, ky proces eshtë mëse transparent falë një ekipi profesorësh dhe doktorësh të njohur, të përfshirë në këtë proces.

“Ministria e Shëndetësisë është më e interesuara që të ofrojë shërbim mjekësor të kualifikuar në të gjithë vendin. Garantojmë se procesi do të jetë transparent”, ka deklaruar Pipero.

Të dy drejtuesit u kanë premtuar studentëve specializantë se do të ketë shtesë të kuotave të specializantëve në mjekësi, më qëllim rritjen e cilësisë së shërbimit.

Madje, studentët që kanë studiuar në universitetet e njohura jashtë Shqipërisë nuk do të përfshihen në kuotat e përcaktuara nga qeveria.