Moody’s dhe Standard and Poor’s certifikojnë stabilitetin e Shqipërisë

Pas një investigimi të hollësishëm, të dyja kompanitë e vlerësimit japin nota pozitive për ecurinë e ekonomisë së Shqipërisë, duke konfirmuar se rritja ekonomike do ruajë nivelin e 4 përqindëshit, duke garantuar stabilitet edhe për reformat e pritshme

Dy kompanitë prestigjioze të vlerësimit të profilit të riskut të letrave me vlerë të qeverive, Mood’s Investors Service (Moody’s) dhe Standard and Poor’s (S&P) kanë publikuar ditët e fundit raportet e tyre të vlerësimit periodik mbi Shqipërinë. Në të dy raportet, kompanitë rikonfirmojnë vlerësimin e tyre të njëjtë për Shqipërinë (B1 nga Moody’s dhe B+ nga S&P), si dhe këndvështrimin e tyre afatmesëm si “stabël” për ekonominë shqiptare. Kompanitë e vlerësimit të riskut analizojnë situatën ekonominë të rajonit dhe më gjerë, duke theksuar se ndryshe nga vendet e rajonit, Shqipëria ka demonstruar një rritje të qëndrueshme ekonomike në nivelin e 4 për qind në vitet e fundit. Përveç rritjes ekonomike të viteve të fundit, kompanitë në vlerësimin e tyre vlerësojnë veçanërisht potencialin e ekonomisë shqiptare për të pasur rritje të qëndrueshme dhe të lartë në vitet në vijim, konsolidimin e vazhdueshëm fiskal me uljen në nivelin e 3 për qindëshit të deficitit, si dhe seriozitetin e qeverisë për të mbajtur nën kontroll dhe ulur gradualisht nivelin e borxhit publik. Moody’s dhe S&P vlerësojnë më tej dhe qëndrueshmërinë e sektorit bankar si likuid, i mirë kapitalizuar dhe me rritje të vazhdueshme të depozitave. Lidhur me të ardhmen europiane të vendit, kompanitë e vlerësimit të riskut çmojnë potencialin e Shqipërisë për të marrë së afërmi statusin e vendit konditat, faktor që nëse kombinohet me uljen e raportit të borxhit ndaj prodhimit të brendshëm, si dhe me zbutjen e risqeve të jashtme financiare, mund të sjellin rritjen në një nivel më të lartë të vlerësimit të riskut (uljen e perceptimit të riskut) sovran të Shqipërisë. Në këtë mënyrë, të dyja kompanitë kanë vlerësuar si tejet të qëndrueshme dhe me potencial të fortë rritjeje ekonominë shqiptare, duke konfirmuar suksesin e reformave të qeverisë. Agjencitë thonë se qeveria shqiptare po punon me seriozitet për të mbajtur nën kontroll dhe ulur gradualisht nivelin e borxhit publik, duke shprehur gjithashtu vlerësimin pozitiv për reformat ekonomike. Sipas këtij vlerësimi, Shqipëria ka bërë progres të rëndësishëm në përmirësimin e forcës së saj ekonomike dhe institucionale që nga fundi i viteve 1990. Sidoqoftë, sfida të konsiderueshme mbeten. Ndërsa ekonomia e saj ka mbetur relativisht elastike gjatë krizës globale financiare e 2008-2009, rimëkëmbja ekonomike ka ende për të marrë hov. Për më tepër, Shqipëria është tani një vend me të ardhura mesatare, vlerësojnë Moody’s dhe S&P. Ky vlerësim vjen në një kohë kur thuajse të gjitha vendet e rajonit dhe të eurozonës janë përballur me ulje të vlerësimit te profilit të riskut, apo minimalisht me përkeqësim të këndvështrimit të prospekteve afatmesme të tyre nga “stabël” në “negative”.