Morën pjesë në mitingun e PS, shkarkohen nga puna 2 naftëtarë

Dy banorë të komunës së Hekalit në rrethin e Mallakastrës, të cilët prej 20 vitesh punonin në sektorin e naftës, kanë humbur vendin e punës vetëm për faktin e pjesëmarrjes së tyre në një takim elektoral. Lajmin e bëjnë të ditur vetë viktimat që e pësuan nga kjo fushatë. Qani Begaj dhe Muharrem Asllanaj, dy ditë më parë kanë qenë të pranishëm në Hekal në një takim që kishin organizuar kandidatët e Partisë Socialiste Ermelinda Meksi, Gramoz Ruçi dhe Pirro Lutaj. Në këtë takim, kanë marrë pjesë edhe dhjetëra banorë të tjerë të zonës. Gjithashtu në këtë takim ishin edhe Qani Begaj, i martuar dhe me fëmijë si dhe Muharrem Asllanaj, babai i katër fëmijëve. Por ky qëndrim i tyre në këtë takim ka rënë në sy të punëdhënësve dhe fill pas kësaj dy shtetasit sapo kanë hyrë në ndërmarrjen e elektrikut të naftës ku dhe punojnë prej më shumë se 20 vjetësh, u është komunikuar largimi nga puna. Zyrtarisht, si unë edhe Muharremi nuk kemi marrë ende një motivacion përfundimtar për largimin nga puna por verbalisht na u komunikua ky pushim për faktin që ne morëm pjesë në mitingun e PS, ka deklaruar Qaniu. Të dy të larguarit pa motivacion real nga puna, janë shprehur se do të ndjekin rrugën ligjore për të denoncuar presionin dhe përndjekjen politike që po u bëhet. Ndërkohë duhet thënë se selia e PS-së së Fierit dhe shtabi qendror elektoral për qarkun e Fierit kanë dalë disa herë në konferenca shtypi ditët e fundit, ku kanë denoncuar raste të panumërta të largimit nga puna të personave që marrin pjesë në takimet elektorale. Ndërkohë mësohet se të gjithë sektorët janë prekur nga shkurtime të tilla.