Mourinho e stimulon Barcelonën

Ylli i Barcelonës, Xavi Hernandez ka thënë se trajneri i Real Madridit, Jose Mourinho e inspiron gjigantin katalan. Mourinho njihet si strateg, i cili asnjëherë nuk heziton ta thotë atë që e mendon, edhe nëse ajo shkakton zemërimin e të tjerëve.

Xavi ka treguar se ngacmimet e Mourinhos si dhe prezenca e tij në bankinën e Realit shërbejnë si inkurajim për kampionin në fuqi.

“Ajo që më intereson mua, është loja, e respektoj shumë Jose Mourinhon, por aktualisht ai është shumë i dobishëm për Barcelonën, sepse ai na stimulon”, tha Xavi për magazinën GQ. Reprezentuesi spanjoll më pas theksoi se arritjet e trajnerit Pep Guardiola do të hyjnë në histori për dallim nga ato të Mourinhos.

“Inter fitoi Ligën e Kampionëve, por referenca është e klubit. Mourinho nuk do të hyjë në histori, sepse nuk ka sjellë diçka të re në futboll, por Guardiola po”, shtoi ai. Xavi në fund lavdëroi bashkëlojtarin e tij, Lionel Messi.

“Për mua, më i miri është Messi, nuk ka tjetër. Ai është i mirë për imazhin e futbollit. Messi më ndihmon edhe mua të jem futbollist më i mirë”, përfundoi Xavi. Messi ka shënuar 17 gola në La Liga deri më tani gjatë këtij sezoni duke udhëhequr Barcelonën në rrugë drejt titullit të tretë të njëpasnjëshëm.