NBA - Serish Boston

Boston Sëlltiks tregoi se i patën mbetur aq forca sa t’i mbijetonte me vështirësi edhe sfidës së dytë në dy mbrëmje radhazi. Skuadra historike e NBA-t ia doli të fitonte pas kohës shtesë në fushën e saj ndaj Atlantës, veçse me vetëm 2 pikë epërsi. Vendimtar ishte i shkathëti Rejxhon Rondo me 10 pikë të shënuara, 10 topa të kapur në tabela dhe 20 asistë, kjo e fundit një shifër e shkëlqyer. Kjo ishte fitorja e katërt radhazi e Bostonit, ndërsa një ndihmë të madhe dha Kevin Garnet me 22 pikë dhe 12 topa në tabela.

Lejkërsat ia dolën të fitonin edhe pse pa lojtarin e tyre më të mirë, Kobi Brajant. Suksesi ishte 98-84 dhe pa lënë asnjë hije dyshimi. Në San Antonio, skuadra kaliforniane pati përqindje shumë të mirë në gjuajtje, sidomos për 3 pikë, si dhe dominoi tërësisht në tabela.

Uorld Pis shënoi 26 pikë, Pau Gasol shënoi 21 dhe Bajnum realizoi 16. Ky i fundit, pra Bajnum, u tregua i jashtëzakonshëm duke kapur 30 topa në tabela.

Edhe skuadra tjetër nga Los Anxhelosi fitoi mbrëmjen e djeshme. Klipers fituan sfidën e fortë në fushën e Oklahomës, duke mundur 100-98 njërën nga kryesueset e ligës. Kris Pol ishte lojtari më i mirë në fushë me 31 pikë për fituesit, ndërsa Grifin shënoi 16, kapi 12 topa në tabela dhe dha 7 asistë. Kevin Durant ishte më i miri për vendasit me 22 pikë dhe 9 topa në tabela.

Mbrëmja e së mërkurës pati shumë ndeshje në të cilat shumë fitore jashtë fushe. Filadelfia fitoi në Toronto, Indiana në Klivlend, Nju Jorku në Miluoki dhe Jutah në Hjuston.