Naum Disho, Gjykata e Korçës: Të shkojë në burg

Kreu i OMONIA-s, Naum Disho

KORÇE – Naum Disho, i dënuar për dhunimin e varrezave në fshatin Boboshticë, edhe një herë do ti drejtohet Gjykatës së Apelit në Korçë, këtë herë për të shtyrë arrestimin e tij deri në momentin kur do të shprehet Gjykata e Lartë. Pasi ka dështuar përpjekja për të shtyrë ekzekutimin e urdhër-arrestit nga Gjykata e Shkallës së Parë, tashmë kërkesa do të shkojë sërish në Gjykatën e Apelit për një shqyrtim të ri. Mesditën e djeshme është bërë edhe kërkesa për shtyrjen e ekzekutimit të urdhër-arrestit ndaj Naum Dishos. Gjykata e Faktit, pasi ka shqyrtuar shkaqet dhe dokumentacionin e paraqitur nga mbrojtja e të pandehurit, nuk ka pranuar kërkesën për të shtyrë arrestimin deri në 6 muaj. Në seancën e zhvilluar, ku është vënë re edhe mungesa e të pandehurit Naum Disho, janë paraqitur disa dokumente përmes të cilave është realizuar argumentimi i mbrojtjes. Certifikata familjare, vërtetimi nga organizata OMONIA, kartela mjekësore, si dhe ekzaminimet, të cilat vërtetojnë gjendjen shëndetësore të të dënuarit për veprën penale të dhunimit të varrezave, i janë vënë në dispozicion gjykatës për të bërë vlerësimin e kërkesës, por kjo e fundit e ka refuzuar atë. Nga ana e Prokurorisë është pohuar se dy arsyet e paraqitura nga mbrojtja, në lidhje me gjendjen shëndetësore dhe atë që lidhet me aktivitetin publik të të dënuarit, janë të pajustifikueshme nga Kodi Penal.                                                               dh.d