Ndërhyrja e ekzekutivit në Kuvend është akoma evidente

Kuvendi i Kosovës as në fillim të këtij viti nuk po arrin të punojë në mënyrë të pavarur dhe pa rekomandime të Qeverisë së Kosovës, konsiderojnë disa nga përfaqësuesit e partive politike opozitare.

Shefi i Grupit Parlamentar të LDK-së, Ismet Beqiri tha se Qeveria në masë të madhe ka ndikuar dhe po ndikon në punën e Kuvendit.

“Një gjë duhet ta kemi të qartë dhe besoj se e kemi. Këto që po ndodhin kohëve të fundit në Kuvend nga partia në pushtet, janë veprime të Qeverisë. Dhe, është shumë e qartë që pengesa që i vjen Kuvendit vjen pikërisht nga Qeveria”.

“Kjo është shumë e qartë, diktimi, tentimi i imponimit të mënyrës së votimit për dhe kundër. Të gjitha këto vijnë nga Qeveria. Kjo është e qartë dhe mund të shihet nga çdokush që dëshiron ta shohë”, tha Beqiri për Rel.

Edhe Glauk Konjufca, nga Vetëvendosje, thotë se Qeveria vazhdon ta shtrijë ndikimin e saj në Kuvend përmes deputetëve të koalicionit qeverisës.

“Po vazhdon edhe këtë vit ai raporti i njëanshëm që e ka pasur Qeveria në raport me Kuvendin, kur Qeveria paraqitet në mënyrë tejet paternaliste karshi Kuvendit dhe ia orienton dhe dirigjon tërësisht agjendën Kuvendit”, tha ai.

Konjufca konsideron se pa e drejtpeshuar relacionin ndërmjet Kuvendit dhe Qeverisë nuk mund të ketë demokraci të duhur.

“Sa i takon fuqisë monitoruese të Kuvendit ndaj Qeverisë, është shumë e brishtë dhe pothuajse nuk po vjen në shprehje aspak, sepse Qeveria është ajo e cila i zbaton ligjet. Mirëpo, Kuvendi është ai i cili e merr në pyetje Qeverinë kur ka ngecje në zbatimin e ligjeve. Ne jemi dëshmitarë që te ne Qeveria shpeshherë nuk i zbaton ligjet dhe shpeshherë i shkel ato”, theksoi Konjufca për REL.

Megjithatë, kryeparlamentari Jakup Krasniqi hedh poshtë deklaratat se punën e Kuvendit të Kosovës është duke e diktuar ekzekutivi. Sipas tij, Kuvendi po e ushtron funksionin e vet. “Kudo, Qeveria tenton t’i bëjë numrat dhe mbi bazën e numrave ajo edhe funksionon. Nëse Qeveria për çështje të caktuara i bën numrat, e ka shumicën, deputetët janë ata që me votat e tyre vendosin për çështje të caktuara”, deklaroi Krasniqi.

Përfaqësuesit e Institutit Demokratik të Kosovës, institut ky që monitoron punën e Kuvendit, kanë deklaruar disa herë se Qeveria në masë të madhe ndikon në punën e Kuvendit.

Në raportet e tyre është thënë se “jemi dëshmitarë që edhe gjatë vitit 2012 nuk ka pasur ndonjë avancim drejt mënjanimit të ndërhyrjes së Qeverisë në punën e Kuvendit të Kosovës”./Indeksonline/