Ndërtime të paligjshme në Kishën e Shna Ndout në Laç, nis procedimi penal

Laç- Prokuroria e Rrethit Gjyqësor Kurbin ka nisur procedimin penal për ndërtime të paligjshme në zonën e Kishës së Shna Ndout në Laç.

Siç bën të ditur Prokuroria e Përgjithshme, procedimi penal ka nisur në bazë të informacionit të mbërritur nga drejtues të këtij institucioni fetar.

Sipas materialit që vetë Rektorii i Kishës së Shna Ndout, ka dërguar në Prokurori, në territorin e këtij objekti ka nisur nga subjekte private ndërtimi i strukturave prej druri dhe betoni, të cilat cënojnë të drejtën e pronësisë, si edhe mund të bëhen shkak për probleme të tjera më të rënda, sipas tij.

Gjithashtu, Prokurori i Përgjithshëm, Adriatik Llalla, ka kërkuar nga drejtuesi i Prokurorisë së Rrethit Gjyqësor Kurbin të ndjekë me përparësi këtë rast, nisur nga fakti se ky objekt fetar ka një ndjeshmëri të lartë në një komunitet të gjerë qytetarësh shqiptarë.