Ndizet sfida Milan-Totenhem, zikaltërit bëjnë tizo për anglezët

Gareth Bejl nuk luan ndaj Milanit. Lajmin e konfirmon menaxheri i Totenhemit, Herri Redknap, që u shpreh i zhgënjyer me mungesën e asit uellsian. Sipas tij, Bejl është tmerri i vërtetë i italianëve. “Bejl nuk është larg nga riaftësimi, por nuk do të jetë i gatshëm për ndeshjen kundër Milanit. Nuk rrezikoj me të. Specialistët e kanë parë, ai ka pasur një injeksion epidural. Peter Krauç ka pasur problem të njëjtë dhe tani është mirë, në fakt, shpina e tij u duk shumë më keq në skaner. Bejl nuk luan të martën, është datë e afërt. A e keni parë çfarë bëri ndaj Interit, i terrorizoi ata dhe kjo është në mendjet e kuqezinjve, nëse do t’i pyesnit ata. Të gjithë në Itali flasin për Bejl-in, unë shkova për të parë një ndeshje dhe të gjithë më pyesnin: ‘A është Bejl-i i gatshëm, a është Bejl-i i gatshëm’. Një gjë është e sigurt, ai do t’i frikësonte për vdekje”, ka thënë Redknap.

Robinjo: Ma sillni Totenhemin

Robinjo dëshiron të fitojë gjithçka me Milanin dhe pas shkatërrimit të Parmës, braziliani mezi e pret duelin e së martës ndaj Totenhemit. “Unë jam vërtet i kënaqur pasi luajtëm një lojë të mirë për të fituar. Ishte me rëndësi për ne që të fitonim. Më pëlqen të luaj përkrah Kasanos, pasi ai ma dha asistin e duhur për gol. Tani le të mendojmë për Totenhemin, ne duam të fitojmë gjithçka. Nëse vazhdojmë të luajmë mirë, ne mund ta fitojmë titullin”, ka thënë superylli brazilian.