“Në 100 vjetorin e Pavarësisë, mirënjohje kontributit historik të gjithë udhëheqësve të besimeve fetare”

Kryeministri Berisha shtron Iftar në nderim të Muajit të Shenjtë të Ramazanit
 
Kryeministri Sali Berisha, në nderim të Muajit të Shenjtë të Ramazanit shtroi dje në mbrëmje, një Iftar për besimtarët myslimane. Kjo darkë mblodhi së bashku shumë miq dhe të ftuar si, drejtues dhe përfaqësues të Komunitetit Mysliman të Shqipërisë, Kryetari i këtij komuniteti Haxhi Selim Muça, Kryegjyshi Botëror i Bektashinjve Baba Edmond Brahimaj, myfti, imamë, intelektualë islamë, drejtues të tjerë të bashkësive fetare në vend si, Kryepeshkopi i Tiranës, Durrësit, dhe gjithë Shqipërisë Fortlumturia e tij Anastas Janullatos, Arqipeshkvi Metropolit i Tiranës dhe Durrësit dhe Kryetar i Konferencës Ipeshkvnore të Shqipërisë, Imzot Rrok Mirdita, Presidenti i Vëllazërisë Ungjillore të Shqipërisë Pastor Fitor Muça, përfaqësues të Komunitetit Mysliman të Kosovës, Maqedonisë, Malit të Zi, përfaqësues të trupit diplomatik të akredituar në vend, përfaqësues të pushtetit lokal, si dhe drejtues të shoqatave të ndryshme fetare.
I ftuar nga kryeministri Berisha, Kryetari i Komunitetit Mysliman të Shqipërisë Haxhi Selim Muça çeli Iftarin dhe më pas Kryeministri Berisha iu drejtua të pranishmëve me një përshëndetje.
Kreu i qeverisë vlerësoi sakrificën e të gjithë atyre besimtarëve, të cilët në përkushtimin e tyre ndaj Zotit, agjëruan muajin e Ramazanit, në kushte të një vere ndër më të nxehtat. Sipas kryeministrit, ata pranuan sakrificën dhe privimin edhe nga pika e ujit, për të dëshmuar përkushtimin e tyre ndaj Zotit, për të dëshmuar virtytin e sakrificës mbi të cilën ndërtohen të gjitha mirësitë dhe arritjet e njeriut.
Kreu i ekzekutivit shqiptare deklaroi se besimet fetare në Shqipëri janë shembull i shkëlqyer i tolerancës dhe mirëkuptimit. Kjo trashëgimi e shkëlqyer tha Berisha, po bëhet gjithnjë e më e njohur në Europë dhe Botë.
“Ne jemi sot të mbledhur këtu nga të gjitha trojet shqiptarë, jemi të mbledhur këtu me përfaqësues të besimeve të tjera të mëdha, në dëshminë e shkëlqyer se besimi te Zoti, përkushtimi ndaj atij, është besimi dhe përkushtimi më suprem i njeriut. Me dëshminë se përkushtimi ndaj Zotit, është frymëzimi i madh për njeriun, për dashurinë, për tolerancën, për mirëkuptimin. Çdo besimtar burrë, grua, i përkushtuar ndaj Zotit ka rastin e madh të dëshmojë vlerat e mëdha të këtij besimi dhe përkushtimi. Vlerat e mëdha të këtij vlerësimi dhe përkushtimi janë mirëkuptimi, toleranca, respekti i ndërsjellë për besimin e tjetrit. Ne shqiptarët kemi një trashëgimi të shkëlqyer, e cila dora dorës vjen duke u bërë gjithnjë e më e njohur dhe dora dorës vjen duke u shpalosur gjithnjë e më shumë në Europë dhe në Botë”, tha më tej Berisha.
Kreu i qeverisë theksoi se bashkëpunimi, mirëkuptimi dhe toleranca fetare që buron nga trashëgimia shpirtërore, janë shëmbëlltyrë e motos së Shqipërisë në kryesimin e KiE, “Të bashkuar në diversitet”.
“Këtë vit këtë 6 mujor, ne kryesojmë institucionin më të vjetër demokratik të Europës të pasluftës, Këshillin e Evropës dhe ky është një nder shumë i madh për ne dhe një nga motot e këtij drejtimi që kemi përzgjedhur, është ‘Të bashkuar në diversitet’ dhe këtë moto ne shqiptarët mund ta ilustrojmë bukur me trashëgiminë tonë shpirtërore, me respektin tonë të madh të ndërsjellë për besimin e  tjetrit, me tolerancën fetare të shkëlqyer që ne kemi”, vijoi ai.
Kryeministri Berisha tha gjithashtu se udhëheqësit e besimeve fetare kanë dhënë një kontribut historik në shpalljen e Pavarësisë së Shqipërisë.
“Këtë vit, që kemi edhe vitin e 100 vjetorit të pavarësisë së vendit është një rast për të shprehur një mirënjohje të thellë ndaj udhëheqësve të kombit të të gjitha besimeve, të cilët dhanë një kontribut historik në pavarësinë e Shqipërisë, në pavarësinë e shqiptarëve, në lirinë e shqiptarëve. Ndaj dhe unë dua të shpreh nderimin tim më të madh për ju dhe përulem me nderim të thellë, ndaj të gjithë atyre, të cilët e shndërruan këtë muaj në muajin e sakrificës fisnike, në muajin e përkushtimit të madh ndaj Zotit dhe vlerave hyjnore që frymëzojnë njeriun”, tha kryeministri Berisha.