Ne 20 mars nis levrimi i kestit te dyte per te perndjekurit

Data 20 mars afati i fundit i për  eliminimin e çdo pengese ligjore për lëvrimin e këstit të dytë për dëmshpërblimin e të përndjekurve politikë. Një fakt i tillë u bë i ditur nga kryeministri, Sali Berisha në mbledhjen e sotme të qeverisë.“Ka patur vonesë, e cila është e diktuar nga amendimet e reja të ligjit për dëmshpërblimin, por kjo vonesë duhet të kapërcehet dhe Ministria e Drejtësisë dhe ajo e Financave kanë marrë masat që kjo vonesë do kapërcehet përmes dy apo tre vendimeve që duhet të miratohen, me qëllim kapërcimin në mënyrë ligjore të vonesave.  Është e domosdoshme që deri në 20 mars të ketë përfunduar çdo vonesë apo pengesë ligjore dhe të fillojë lëvrimi i këstit të dytë, pasi ai është i shumëpritur nga ish-të përndjekurit”, vuri në dukje kreu i qeverisë.
Sipas kryeministri Berisha, amendimet imponojnë jo vetëm një shtim substancial të numrit të personave, por gjithashtu dhe lëvrimet për një moshë të caktuar të kësaj kategorie.

Heqja e imunitetit
Kryeministri Berisha akuzoi ashpër opozitën parlamentare, pasi sipas tij po pengon integrimin e vendit, duke bllokuar votimin e reformave të rëndësishme këtë proces. Nga ana tjetër, kreu i ekzekutivit garantoi gadishmërinë e mazhorancës që ai drejton për të plotësuar çdo kërkesë të ardhur nga faktori ndërkombëtar, ashtu sikurse do të vijojë një luftë e ashpër ndaj korrupsionit. Madje në këtë kontekst kryeministri Berisha bëri me dije “qeveria është e gatshme të votojë për heqjen e imunitetit qoftë me ligje organike sipas rekomandimeve të Komisionit të Venecias, ashtu dhe me ndryshim në Kushtetutë, siç kërkon opozita”.
Gjithashtu, në këtë kontekst, Kryeministri rikujtoi se “heqja e imuniteteve është firmosur në 2004 nga PS, por mëkatarët kanë frikë ta heqin atë, duke u fshehur pas tij”.
Megjithatë, kreu i qeverisë premtoi se “qeverisja aktuale nuk do të rreshtë në avancimin e axhendës tonë në interes të vendit dhe në interesin më të mirë të integrimit”. 

Zhvillimet në vend

Në fillim të fjalës së tij në mbledhjen e rardhës së Këshillit të Ministrave, Kryeministri berisha përgëzoi Ministrinë e Arsimit, lidhur me nismën më të fundit të saj sa i takon zhvillimit të provimit të shtetit. Ndalur në këtë çështje kreu i qeverisë vlerësoi si të rëndësishëm ridimensionimin e proceseve dixhitale në universitete.
Njëkohësisht, kryeministri Berisha duke vijuar në zhvillimet e ditëve të fundit veçoi dhe hapjen e sporteli për dhënien e lejeve dhe leçnsave në Bashkinë e Tiranës.
“Është për tu përgëzuar, hapja në Bashkinë e Tiranës e sportelit unik për lejet dhe licencat. Së bashku me sportelin qendror kjo përbënë një hap të tjetër të madh në luftën kundër korrupsionit”, u shpreh Berisha.
Por në këtë kontekst, Kryeministri kërkoi se një sportel i tillë të mundësohet për të gjitha bashkitë e mëdha të vendit.
Ndërkohë që ndalur në zhvillimet ekonomike, kryeministri Berisha vlerësoi se “ka mjaft rëndësi privatizimi i HEC-ve, pasi kjo përbën shtyllën e ekonomisë”.
Sipas Kryeministrit privatizimi është një armë mjaft e fortë në luftën ndaj korrupsionit.
Në fjalën e tij, kreu i qeverisë nuk mund të mos veçonte dhe mirëmbajtjen e Rrugës së Kombit, ku vlerësoi si element të rëndësishëm që firma e cila do të marrë me konçension mirëmbajtjen e segmentit Milot-Morinë.