Në Drinin e Bardhë gjendet kufoma e një 25-vjeçareje të vrarë

Prishtinë, 27 gusht – Kufoma e një femre rreth 25 vjeçe, identiteti i së cilës ende nuk dihet, është gjetur të premten rreth orës 17:00 në rrjedhën e lumit Drini i Bardhë, në fshatin Zajm të Klinës, tek vendi i quajtur “Ura e Haxhisë”, i kanë thënë gazetës burime brenda policisë. Policia ishte njoftuar nga qytetarët për gjetjen e kufomës, ndërsa në momentin që janë afruar policia, viktima i ka pasur të lidhura duart dhe këmbët me litarë, ndërsa ka qenë e mbështjellë me najlon. Gjetjen e kufomës e ka konfirmuar edhe komandanti i Stacionit të policisë në Klinë, Agron Hasanaj, i cili nuk ka dashur të japë asnjë detaj, për shkak të hetimeve.
Sipas shikimit preliminar që i është bërë vendit të ngjarjes, hetuesit e policisë dhe mjeku që kanë dalë në vendin e ngjarjes, kanë konstatuar se akti makabër i vrasjes së vajzës rreth 25 vjeç mund të jetë kryer gjatë këtyre ditëve dhe nuk bëhet fjalë për ndonjë periudhë kohore më të gjatë se një javë.