Në aeroplanin e Katzynskit ka pasur TNT?

Hetuesit polakë kanë zbuluar lëndë shpërthyese në mbetjet e aeroplanit të qeverisë, i cili para dy viteve u rrëzua në Rusi, me ç’rast humbën jetën presidenti i Polonisë, Lech Katzynski dhe 95 persona tjerë, njoftoi gazeta polake, “Zecpospolita”.

Prokurorët dhe ekspertët për lëndë shpërthyese, të cilët kanë kontrolluar mbetjet e aeroplanit në Rusi, në krahët dhe kabinën e aeroplanit kanë zbuluar TNT dhe nitroglicerinë, theksoi gazeta, duke mos përmendur burime.

Në raport u theksua se gjurmë të lëndëve shpërthyese janë zbuluar edhe në 30 ulëse, si dhe në rajonin ku më 10 prill të vitit 2010 u rrëzua aeroplani, përderisa po i afrohej aeroportit në Smolensk.

Në ndërkohë, në Varshavë para dy ditësh u gjet i vdekur njëri nga dëshmitarët kryesor të rrëzimit të aeroplanit, Remigius Mus, ndërsa hetuesit theksuan se bëhet fjalë për vetëvrasje.

Mus, i cili në momentin e katastrofës gjendej në kabinën e një aeroplani, i cili një orë para tragjedisë kishte ateruar në Smolensk dhe i cili nëpërmjet radiolidhjeve kishte dëgjuar bisedën e pilotëve të aeroplanit presidencial me kontrollorin në Smolensk, është gjetur i varur në bodrumin e shtëpisë së tij në Varshavë.