Në gjyq mashtruesi që shiti tre herë një pronë

Xhavit Oruçi ka mashtruar tre ndërtues duke i dhënë secilit të njëjtën tokë për të bërë pallat. Toka nuk ishte as e tija

TIRANË- Prokuroria e kryeqytetit, përfundoi fazën hetimore dhe dorëzoi në gjykatë dosjen penale në ngarkim të 67 vjeçarit Xhavit Oruçi, i cili me anë të mashtrimit dhe falsifikimit të dokumenteve i shiti të njëjtën pronë tre ndërtuesve të ndryshëm. Ky lajm konfirmohet nga burimet zyrtare pranë organit të akuzës dhe Gjykatës së Shkallës së Parë në kryeqytet, kancelaria e së cilës me ndihmën e shortit elektronik ka caktuar gjyqtarin Albert Meçe si trup gjyqësore që do të gjykojë plakun 67- vjeçar.

Sipas kërkesës për gjykim që mban numrin 2099, i pandehuri i shpallur në kërkim nga policia gjatë muajit mars të këtij viti ka përfituar shtatë milionë lekë të reja nga shitja e 700 metrave tokë në fshatin Fushë-Mëzez të komunës së Kasharit. "Nga hetimet disa mujore, është provuar se i pandehuri 67- vjeçar Xhavit Oruçi, me origjinë nga rrethi i Kukësit, me anë të dokumenteve të falsifikuara ka mashtruar tre ndërtues të njohur në kryeqytet, duke ia shitur pronën prej 700 metra katrorë që ndodhet në Fushë-Mëzez. Kjo pronë rezulton se është e një banori të zonës, i cili dispononte certifikatën e pronësisë dhe hartën plotësuese të kufijve të kësaj toke, të cilën 67- vjeçari me dokumente të falsifikuara e kishte përvetësuar dhe më pas shitur tre personave të ndryshen duke iu marrë shtatë milionë lekë të reja të treve"-thuhet në kërkesën për gjykim.

Mësohet gjithashtu se plaku kishte falsifikuar certifikatën e pronësisë dhe një hartë plotësuese të lëshuar nga Hipoteka e komunës Kashar, ku pretendonte se toka prej 700 metra katror ishte e tija. "Pasi ka falsifikuar këto dokumente, plaku 67- vjeçar Oruçi ka kontaktuar me ndërtuesit, duke nënshkruar me secilin prej tyre kontratën e shitjes së kësaj toke. Nga shitja, plaku kishte përfituar rreth shtatë milionë lekë të reja dhe më pas është zhdukur, duke i lënë në duar kontratën e shit-blerjes së firmosur tek noterja, certifikatën e pronësisë të falsifikuar dhe hartën e vend ndodhjes së kësaj toke",-thuhet në dosje. Sipas akuzës, me këto letra ndër duar tre ndërtuesit kishin dërguar përfaqësuesit e tyre në Hipotekë për ta regjistruar pronën, kur punonjësi i Zyrës së Regjistrimit të Pasurisë së Paluajtshme kishte konstatuar falsifikimin dhe ka njoftuar policinë. Efektivët e policisë, kanë shoqëruar përfaqësuesit e firmës blerëse duke i marrë në pyetje, bashkë me pronarët e tyre për tentimin e përvetësimit të një prone që nuk ishte e tyre me dokumente të falsifikuara.

Para hetuesve, ndërtuesit kanë denoncuar shitësin e tyre të cilin e kanë shpallur tashmë në kërkim. Ndërkohë, para togave të zeza i pandehuri në mungesë Xhavit Oruçi do të gjykohet për veprat penale të "Mashtrimit në dëm të disa personave me pasoja të rënda" dhe "Falsifikimit të dokumenteve".