Negociatat për Presidentin, nis takimi Berisha-Rama

Takimi i paraprin raundit të dytë kushtetues të zgjedhjes së Presidentit të ri. Dy ditë më parë kryeministri Berisha u shpreh i hapur për një takim me z.Rama, nëse ky i fundit ka një platformë për zgjedhjen e kreut të shtetit. Berisha ka kujtuar gjithashtu se në mungesë të konsensusit të opozitës, presidenti i ri do zgjidhet sipas marrëveshjes PD-LSI

UPDATE- Vetëm pak minuta më parë, në ambientet e kryesisë së Kuvendit, ka nisur takimi mes kryetarit të PD-së dhe njëherazi kryeministrit të vendit, Sali Berisha dhe kreut të Partisë Socialiste, Edi Rama, të shoqëruar nga kryetarët e grupeve parlamentare, respektivisht Astrit Patozi dhe Gramoz Ruçi. Objekt i këtij takimi negociues dhe konsultativ do të jetë vetëm zgjedhja e presidentit. Partia Socialiste është tërhequr nga paketa e saj kushtëzuese me 4-ër pika, ndërsa duket se është fokusuar vetëm te zgjedhja e kreut të ri të shtetit. Edhe pse raundi i parë i procesit u ezaurua pa votim dhe kandidatë, pavarësisht se oferta e mazhorancës ishte një ofertë mjaft e mirë, produkt i një tryeze negociatash të koalicionit mazhorancës, mungoi konsensusi i opozitës. Në një krizë besimi mes palëve, Xhezair Zaganjori u refuzua nga PS si kandidaturë e njëanshme, edhe pse CV-ja e tij s’kishte qoftë edhe një angazhim të vetëm politik pranë Partisë Demokratike apo Lëvizjes Socialiste për Integrim (si dy forcat politike kryesore të tryezës së mazhorancës).