Nga 500 mije persona pa pasaporta qe ndodhen ne vend, 460 mije kane aplikuar

Ministria e Brendshme i dorëzon PS-së dhe misionit të OSBE-ODIHR-it në Tiranë listën emërore të personave pa pasaportë. Dikasteri shpreh keqardhjen për dizinformacionin që bën opozita e Edvinit, e cila po tenton të spekulojë me korrektësinë e shifrave zyrtare të komunikuara nga kjo ministri

TIRANE – Rreth 40 mijë është numri i qytetarëve pa pasaportë që gjenden aktualisht në Shqipëri dhe që ende nuk kanë aplikuar për të marrë letërnjoftimin elektronik, një procedurë kjo që në bazë të Kodit të ri Zgjedhor i mundëson gjithsecilit pjesëmarrjen në zgjedhjet e 28 qershorit. Shifra është bërë publike dje nga ana e zëdhënësit të Ministrisë së Brendshme, Fatmir Konja.
“Ministria e Brendshme rikonfirmon edhe njëherë faktin e ecurisë normale të procesit të pajisjes së qytetarëve pa pasaportë me letërnjoftimin elektronik. Deri ditën e djeshme kanë aplikuar 1 150 000 shtetas. Për arsye sigurie aplikimet ngarkohen në sistemin e kontrollit të konçensionarit pas aplikimit. Deri tani janë hedhur në sistem dhe dërguar në MB 1 milion e 13 mijë aplikime nga të cilat 420 000 i takojnë atyre pa pasaportë.  Por, numri total i personave pa pasaportë që kanë aplikuar deri tani është më shumë se 460 000. Ministria e Brendshme shpreh keqardhjen për dizinformacionin që bën Partia Socialiste duke tentuar të spekulojë me korrektësinë e shifrave zyrtare të komunikuara nga kjo ministri. Partia Socialiste ka konfirmuar në korrespondencën e saj zyrtare, por edhe në takimet me diplomatë të huaj, se nuk pret që të aplikojnë për letërnjoftimet elektronike më shumë se 500 000 qytetarë nga grupi i atyre që janë pa pasaportë”, deklaroi Konja. Nga ana tjetër ai konfirmoi dje se Ministria e Brendshme i ka dërguar Partisë Socialiste listën emërore të personave pa pasaportë që kanë aplikuar deri tani, si dhe listën e personave pa pasaportë që kanë mbetur ende pa aplikuar. Po ashtu kjo ministri i ka dërguar Partisë Socialiste, Prezencës së OSBE-së në Tiranë si dhe Misionit të ODIHR, analizën e saktë se nëpërmjet 476 stacioneve të aplikimit që sot punojnë 7 ditë të javës nga ora 08 e mëngjesit deri në orën 21 të mbrëmjes, janë në dispozicion kapacitete për të aplikuar edhe më shumë se 400 000 qytetarë të tjerë.
“Ministria e Brendshme shpreh keqardhjen për tentativat e pandërprera të Partisë Socialiste për të dekurajuar këtë proces. Ministria e Brendshme shpreh sigurinë e saj të plotë se çdo qytetar që nuk ka një pasaportë dhe paraqitet për të aplikuar deri
në datën 15 qershor, i ka të gjitha kushtet normale që të pajiset me letërnjoftimin elektronik”, deklaroi zëdhënësi Konja.
Vetëm dy ditë më parë gjatë një komunikimi me mediat Ministri i Brendshëm, Bujar Nishani pasi konfirmoi se procesi po ecën më rrimet e duhura bëri të ditur edhe një vendim të marrë në bashkëpunim me firmën prodhuese të dokumenteve biometrike “Aleat”, se do t’u jepet përparësi në aplikim personave që nuk kanë pasaporta.