Një qeveri e dyshimtë dhe mungesa e opozitësNga Ledion Kristafi, worldpress.orgZgjedhjet parlamentare të 28 qershorit krijuan një situatë të çuditshme në Shqipëri. Partia Demokratike, e cila fitoi zgjedhjet, formoi një qeveri të re këtë muaj të kryes

Nëse dëshironi të lexoni edicionin online të gazetës në PDF klikoni këtu.

Zgjedhjet parlamentare të 28 qershorit krijuan një situatë të çuditshme në Shqipëri. Partia Demokratike, e cila fitoi zgjedhjet, formoi një qeveri të re këtë muaj të kryesuar nga Sali Berisha, por opozita nuk merr pjesë në seancat parlamentare.

Situata ekonomike nuk është e mirë, monedha shqiptare humbet pikë me shpejtësi kundrejt euros dhe papunësia rritet. Para disa muajsh qeveria parashikoi rritje ekonomike më shumë se 6 për qind, që do të ishte më e madhja në Evropë, por arritja e saj është e dyshimtë. Ekspertët e FMN kanë parashikuar një rritje jo më të lartë se një për qind.

Para fushatës elektorale qeveria bëri investime të mëdha publike dhe krijoi iluzionin e një ekonomie në rritje dhe të shëndetshme. Por të dhënat e fundit të INSTAT tregojnë se prodhimi industrial ka rënë më shumë 23 për qind. Në këtë situatë, opozita pret me padurim zgjedhje të parakohshme, ndërsa PD betohet për integrimin e vendit në BE gjatë katër deri në gjashtë vitet e ardhshme.

Një raport i fundit i OSCE-ODIHR, që monitoruan zgjedhjet në Shqipëri, tha se në zgjedhjet e qershorit Shqipëria hodhi një hap të madh përpara. “Zgjedhjet parlamentare shënuan progres të dukshëm në lidhje me regjistrimin e votuesve dhe procesin e kartave të identitetit, kornizën ligjore të miratuar me konsensus nga të dyja partitë kryesore, votimin, numërimin dhe gjykimin e ankesave.”

Por kishte edhe probleme. Problemi më i madh i zgjedhjeve ishte politik. Raporti vazhdonte: “Përmirësimet themelore u lanë në hije nga politizimi i aspekteve teknike të procesit, përfshi gjatë numërimit të votave dhe afishimit të rezultateve, të cilat bllokuan procesin e numërimit përkohësisht në disa zona, si dhe dhunë e vënë re gjatë fushatës elektorale.”

Këto janë fjalë të hidhura për skenën politike shqiptare, por jo të reja. KQZ zgjidhet nga partitë politike në parlament; numëruesit e votave zgjidhen nga partitë politike; kutitë e votimit ishin vendosur në vende të dyshimta si kafene ose dyqane private. Duke patur parasysh këto fakte, nuk ishte habi që zgjedhjet u lanë hije nga politika. Procesi i numërimit u monitorua me kamera, por partitë e vogla, që mbetën jashtë parlamentit, thanë se u ishin vjedhur votat. E njëjta deklaratë u bë edhe nga PS, e cila pretendoi se zgjedhjet u vodhën.

Qeveria e re u miratua nga parlamenti më 16 shtator. Si gjithmonë, premton reforma të mëdha, por kompozimi i saj hedh dyshime. Dy nga 15 ministrat janë akuzuar nga Prokuroria e Përgjithshme për korrupsion dhe kanë çështjet të hapura në gjykatë. Në dhjetë vitet e fundit janë bërë shumë akuza për korrupsion, por asnjë zyrtar i lartë nuk është dënuar me burg. Këto raste nuk do të jenë të ndryshme. Sistemi gjyqësor është më i dyshimti në vend. Synon të luftojë korrupsionin, por vazhdimisht njihet si institucioni më i korruptuar në Shqipëri.

Pak para zgjedhjeve të sivjetshme Shqipëria aplikoi për anëtarësim në BE. Ky ishte një hap i madh për një vend të trazuar. Aplikimi ende nuk është shqyrtuar nga BE, por rezultati ka mundësi të jetë pozitiv. Megjithatë, Shqipëria nuk ishte ndër vendet që përfitoi nga liberalizimi i vizave me BE. Shkaku: mungesa e reformave.

Në këtë gjendje zgjedhjet e parakohshme do të ishin një goditje e rëndë për aspiratat evropiane të vendit. Por situata politike është e tensionuar. Opozita e quan qeverinë e re të paligjshme dhe kërkon rinumërimin e votave në disa zona. Raporti i OSCE-ODIHR thoshte që procesi i numërimit ishte me probleme në një të tretën e rasteve. Kjo padyshim hedh dyshime mbi rezultatin e zgjedhjeve. Margjina e fitores ishte aq e ngushtë, saqë edhe probleme të vogla në numërim mund të kenë ndikuar.

Është e vështirë të parashikosh të ardhmen e afërt politike të vendit. S’ka dyshim që qeveria e re do të ketë një rrugë të vështirë përpara. Në parlament duhet të kalojnë ligje të rëndësishme, por ato kanë nevojë për 84 vota, që mazhoranca nuk i ka. Prania e huaj në Shqipëri i ka bërë thirrje të vazhdueshme PS që të futet në parlament. “Debatet demokratike bëhen brenda institucioneve”, - tha kreu i delegacionit të Komisionit Evropian në Tiranë.

Shqiptarët janë më të shqetësuar për ekonominë, e cila po ecën keq, megjithëse qeveria thotë të kundërtën. Në dy vitet e fundit remitancat kanë rënë, investimet e huaja janë të ulëta, dhe shpenzimet qeveritare janë të mëdha, duke lënë pas një buxhet në rritje.

Qeveria nuk e bën publike gjendjen e ekonomisë. Thuajse gjysma e ekonomisë shqiptare është informale, që do të thotë se parashikimet për GDP janë të dyshimta. Nëse marrim në konsideratë fjalët e ekonomistit nobelist Joseph Stiglitz, i cili në një artikull të fundit thoshte se “GDP nuk është më e besueshme për matjen e ekonomisë së një vendi”, situata në Shqipëri duket e errët.