Një sjellje qeveritare që s’do koment

Shteti duhet të respektojë çdo kontratë, aq më tepër kur është fjala për kontratat afatgjata me operatorë mediatikë. Nuk është hera e parë që tentohet prishja e një kontrate afatgjatë me median. Më parë “TVA”, më pas “Top Channel” dhe tani gazeta “TemA”. Si princip, edhe në rastet madhore prishja e kontratës bëhet duke dëmshpërblyer deri në qindarkën e fundit palën e dëmtuar. Në një shtet dhe shoqëri të bazuar mbi normat demokratike dhe sundimin e ligjit nuk është normale që të zgjohesh në mëngjes dhe të lexosh një shkresë nga ministri, të firmosur nga dy ministra, se duhet të ngresh plaçkat me natë, se vendi i punës ku t’i punon është kthyer në “ambient interesant për publikun”. Gazeta tanimë ndodhet para një fakti të kryer. E vetmja rrugë ligjore mbetet dera e gjykatës. Precedenti që po krijohet është një mësim i hidhur për bizneset (kryesisht ato mediatike), që të mendohen mirë, nëse iu shkon në mendje të hyjnë në marrëdhënie kontraktuale me shtetin e vet. Kur lëvizje të tilla tektonike ndodhin brenda një mazhorance, imagjino çfarë garancie ke me një kontratë 20-vjeçare, ku teorikisht do të kesh të bësh minimumi me 5 qeveri!

Dhe së fundi, por jo nga rëndësia, një media funksionon si biznes dhe çdo pengim që i bëhet këtij biznesi automatikisht pengon lirinë e shtypit dhe të shprehjes, një nga boshtet ku mbështet funksionimi i një shoqërie të lirë. Kur bëhet fjalë për një media kritike ndaj qeverisë, komentet janë të tepërta.