Nulifikimi i kufirit, Dora Bakojanin akuzon Ramën dhe Papandreun

ATHINË – Pas reagimit të selisë diplomatike në Athinë për vendimin e Gjykatës Kushtetuese, vjen një tjetër reagim nga Athina. Ish-ministrja e Jashtme, Dora Bakojanis, një nga firmëtaret e Marrëveshjes së nënshkruar me qeverinë shqiptare për ndarjen e vijës kufitare detare, ka akuzuar kryetarin e PS-së, Edi Rama për nulifikimin e paktit Berisha-Karamanlis. Në shënjestër të akuzave ka qenë edhe kundërshtari i tij politik, kryeministri aktual i Greqisë, Jorgos Papandreu. Madje, Bakojanis e akuzoi zotin Rama për prishje të marrëdhënieve mes dy vendeve. Pasditen e së enjtes ish-kryediplomatja greke shpërndau një deklaratë zyrtare për zhvillimet më të fundit në Shqipëri në lidhje me Marrëveshjen për ndarjen e vijës detare mes Shqipërisë dhe Greqisë. “Së pari, shpreh keqardhjen për anulimin prej gjykatës shqiptare të kësaj Marrëveshjeje”, - thuhet në reagimin zyrtar të Bakojanis, e cila akuzoi edhe qeverinë e re greke të PASOK-ut, që nuk e dërgoi Marrëveshjen për ratifikim në Parlament, pasi ajo ishte shumë e rëndësishme për Greqinë”. “Madje, gjatë kohës që unë drejtoja Ministrinë e Jashtme, u mundova ta përfundoja atë sa më shpejt të ishte e mundur. Kjo marrëveshje duhej të dërgohej në parlamentin grek që javën e parë që ai u hap, me qëllim krijimin e një atmosfere pozitive, e cila do të pengonte këtë fund aspak të këndshëm”, - është shprehur Bakojanis. Sipas saj, vendimi i Gjykatës Kushtetuese të Shqipërisë është nxitur nga ekstremistët shqiptarë, me të cilët është bashkuar kryetari i Partisë Socialiste të Shqipërisë, Edi Rama. “Së dyti, anulimin e marrëveshjes e kërkuan grupime ekstremiste në Shqipëri, ndaj përgjegjësia e Partisë Socialiste të Shqipërisë është se lideri i saj, Edi Rama u bashkua me këto forca. Madje, kreu i PS-së e deklaroi kontestin e tij që prej datës 15 tetor të vitit të kaluar”. “Me vjen keq që partia simotër e PASOK-ut nuk mundi të kalojë stereotipet dhe të bjerë dakord me këtë Marrëveshje”, - thuhet në deklaratën e dalë nga zyra e zonjës Bakojanis. Ish-shefja e diplomacisë greke shton më tej se përgjegjësi për anulimin e paktit ka edhe PASOK-u, i cila nuk i paraqiti palës shqiptare përfitimet nga ky pakt.
“PASOK-u duhej t’i kishte treguar aleatëve të tij në Partinë Socialiste të Shqipërisë, lidhur me përfitimet e palës shqiptare nga kjo Marrëveshje”, - theksoi ish-kryediplomatja e Greqisë. Ai u shpreh se: “Ne i ngritëm marrëdhëniet dypalëshe në një pikë, e cila konsiderohet si më të mirat në historinë e tyre. Insistoj që ajo u përpilua dhe u firmos, duke pasur parasysh të drejtën ndërkombëtare të vendosur nga OKB”, - përfundon Bakojanis. Ish-ministrja e Jashtme e Greqisë, njëherësh, një nga drejtueset e partisë opozitare “Nea Demokracia” ka akuzuar edhe më parë Papandreun, sidomos pas refuzimit të projektit të naftësjellësit Burgas-Aleksandroupulos.
Dy ditë më parë reagoi edhe zëvendësministri i Jashtëm, Dukras, i cili tha se Greqia është shumë e shqetësuar për zhvillimet që kanë të bëjnë me marrëveshjen për ndarjen e vijës kufitare detare në Shqipëri. Ai tha se Athina zyrtare prêt shpjegime nga qeveria shqiptare për situatën pas vendimit të Gjykatës Kushtetuese.

29 Janar 2010