OSSH, niveli i humbjeve arrin 35.86 për qind

Të dhënat e fundit zyrtare tregojnë se sektori i energjisë vazhdon të mbetet në tranzicion dhe i padisiplinuar financiarisht.

Kur po mbushet gati një vit që nga koha kur OSSH-ja kaloi në dorë të privatëve, shifrat tregojnë se humbjet dhe vjedhjet e energjisë mbeten në nivele të larta. Sipas të dhënave të Entit Rregullator, në fund të katër muajve të parë të vitit, humbjet e energjisë në shpërndarje ishin sa 35.8 për qind e totalit të energjisë së hedhur në rrjet. Ndonëse është 1.7 për qind më e ulët se 4-mujori i parë i vitit të kaluar, krahasuar me 2008-ën humbjet janë rritur.

Në deklaratën rregullatore, Enti i Energjisë i ka vënë detyrë OSSH-së, tashmë private, që gjatë këtij viti t’i ulë humbjet e energjisë në shpërndarje me 4 për qind, duke i çuar ato në nivelin 30 për qind. Por për katër muajt e parë shifra është 5.8 për qind më e lartë nga objektivi, çka tregon se menaxhimi i sektorit energjetik po rezulton i vështirë edhe për privatët.

Veç humbjeve, të dhënat tregojnë se edhe treguesi tjetër, ai i arkëtimeve, mbetet problematik, madje me përkeqësim krahasuar me vitet e mëparshme. Në fund të 4-mujorit, arkëtimet e energjisë ishin 5 për qind më të ulëta se një vit më parë. Për sa kohë sektori i shpërndarjes do të vazhdojë të mbetet i shthurur financiarisht, konsumatorët e ndershëm do të vazhdojnë ta paguajnë energjinë dyfish, edhe për ata që vjedhin. Nga ana tjetër, rreziku që autoritetet t’i rikthehen sërish kurës së vjetër, asaj së rritjes së çmimit, e cila sërish bie mbi ata që paguajnë, do vijojë të mbetet i lartë.

TCH