Oficeri i Policisë sulmohet nga nxënësit pas provimit

Gjimnazi ku ndodhi ngjarja

DURRES – Një oficer policie mbeti i plagosur rëndë, pasi është goditur me mjete të forta nga një grup nxënësish të klasës së 9-të. Ngjarja e pazakontë është zhvilluar në ambientet e gjimnazit Gjergj Kastrioti në Durrës dhe ka pasur për protagonist një grup nxënësish dhe oficerin e Policisë, Artan Isufi, 28 vjeç. Ky i fundit ka marrë plagë të rënda në pjesë të ndryshme të trupit dhe është dërguar menjëherë në spital nga kolegët e tij. Mjekët thanë se, përveç të çarave dhe plagëve të shumta të gjetura në trupin e oficerit, u konstatuan edhe thyerje. Mësohet se Isufi ka rënë nga një lartësi e konsiderueshme dhe, si pasojë, ka thyerje në këmbën e majtë. Gjithçka ka nisur pas përfundimit të provimit të matematikës që klasat e 9-ta zhvillonin gjatë ditës së djeshme. Oficeri u kishte kërkuar një grupi prej 4-5 djemsh të mos bënin zhurmë dhe të dilnin përjashta, në mënyrë që të mos shqetësonin shokët e tyre, por kjo është marrë si ofendim nga djemtë dhe kanë refuzuar. Aty gjakrat janë ndezur dhe nuk ka vonuar të nisë sherri. Përballë oficerit kanë qenë disa adoleshentë, të cilët e kanë sulmuar fizikisht. Pasi ka marrë disa goditje, polici ka humbur ekuilibrin dhe është rrëzuar nga një lartësi e shkallëve, ku dhe pësoi dëmtimin e rëndë. Zhurmat kanë nxjerrë nga sallat nxënësit dhe mësuesit, ndërsa është lajmëruar policia dhe ambulanca për atë që po ndodhte. Autorët nga ana e tyre ikën me shpejtësi, por sipas Policisë janë identifikuar, pasi ishin nxënës të shkollës. Mësohet se provimi ka rinisur pas një ndërprerje në kohë.                        l.m