Ohër: Baroso kërkon zgjidhje të shpejtë të problemit me emrin

Kryetari i Komisionit Evropian, Zhose Manuel Baroso ka kërkuar nga autoritetet në Shkup, të zgjidhin sa më shpejt çështjen e emrit, që të mund të hapen negociatat për anëtarësim në Bashkimin Evropian.

Pas takimit në Ohër me kryeministrin Nikolla Gruevski, Baroso gjithashtu kërkoi përfundimin e reformave, vendosjen e dialogut politik dhe konsensus mes partive për çështjet me rëndësi strategjike për vendin.

“Çështja e emrit duhet të zgjidhet sa më shpejt që të jetë e mundur. Besoj se vendi juaj duhet t`i vazhdoj bisedimet me Bashkimin Evropian,por, për këtë duhet të zgjidhet çështja e emrit. Shpresoj se do të zgjihet një orë e më pare”, u shpreh Baroso.

Kryetari i Komisionit Evropian ka thënë se 2011-ta është vit i posaçëm për Maqedoninë pasi “ këtë vit mbushen 10 vite nga nënshkrimi i Marrëveshjes së Stabilizim-Asocimit si dhe nga nënshkrimi i Marrëvehsjes së Ohrit.

Baroso gjithashtu ka shprehur besimin se Maqedonia do të arrijë zgjedhje të lira dhe demokratike, por nuk ka dashur të pargjykoj përmbajtjen e raportit të ardhshëm të Komisionit Evropian që do të publikohet në vjeshtë.

Ndërkohë, kryeministri Nikolla Gruevski tha pas takimit se Maqedonia është e gatshme të zgjidh kontestin me Greqinë, por zgjidhja sipas tij “ nuk duhet të rrezikoj interesat shtetërore dhe nacionale të Maqedonisë”.

Gruevski gjithashtu ka prezantuar para delegacionit Evropian edhe punën që sipas tij është bërë në “përmbushjen e reformave në gjyqësor, në administratën publike dhe luftën kundër korrupsionit ”.

Gruevski ka thënë se qeveria që ai drejton është e përkushtuar për vazhdimin edhe të reformave të tjera.

Baroso dhe Komisioneri për zgjerim i BE-së, Stefan Fyle i cili gjithashtu qëndron në Ohër, gjatë ditës janë takuar edhe me presidentin Gjorgje Ivanov dhe me liderët e LSDM-së dhe BDI-së, Branko Cërvenkovski dhe Ali Ahmeti.